Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van alexanders vromicheit Ca. lx.

INder maent iulius diemen hoymaent hiet mit ons soe starf dese grote alexander doe hi in sinen driendertichste iaer was Hi was die meeste van moede ende van herten die ye inder werelt quam Hi was oec die machtichste man die ye inder werelt regneerde Hi verloste altoes sijn ridders wt haere noot mit sinen troeste soe dat hi mit sinen troeste soe stout worden soe dat hem docht al hadden si alle naect gheweest hem en hadde niet moghen deeren, wanneer si en saghen Hem en gheuiel oec nye dat hi enighe man bestont hi verwannen Noch nye en bestont hi vest noch borch noch stat hoe vast dat si waren hi en wanse of hadse tot sinen wille Nye en quam oec volc teghen hem te stryde hi en verwanse Mer int eynde wort hi seluer verwonnen mer niet mit gheuechte, mer mit verradenisse van sinen dienres dien dus daden vergheuen mit fenijn soe moerdelic Men leest dat hi enen steen hadde, so wien dien steen droech

[fol. h1r]

dat hem gheen fenijnt scaden en mocht mer daer hi dus verraden was, soe was hem des nachts die steen benomen, om dat die moert voldaen soude worden ende verholen bliuen mer alst fenijnt in die aderen ghetogen was alsoe dat die natuer niet en conde ghelosen soe wort hem sinen steen weder ghegheuen al heymelic Dus verghinc die auontuer mit hem als die maer quam in babilonien dat hi doot was in die bloeme sijnre ioecht, ende int meeste sijnre craft, soe wort die stat drouich mer die luden en woudens niet ghelouen die hi verwonnen hadde dat hi doot soude sijn want si gheloefden dat hi nemmermeer en soude moghen steruen, sonderlinghe om dat si ghesien hadden dat hi in groter auonturen dicwijl verlost wort vander doot mer doe si wel die waerheit wisten dat hi seker doot was, soe beweenden si hem harde seer Als darius dochter alexanders wijf dit vernam soe hadde si soe groten rouwe, soe dat si daer na niet en at Mer alexanders magen wt gryeken en hadden ghenen rouwe om hem meer dan oft hoer viant gheweest hadde Darius dochter alexanders wijf om dat haer an leyden ende ryeden haren ghespelen enen anderen man

[fol. h1v]

te nemen, soe dede sise doden