Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt
(1477)–Anoniem Die hystorie vanden grooten Coninck Alexander–
Auteursrechtvrij
[Folio g5r]
| |
scencten voer den coninc yollas ende philips sijn broeder Ende waren wel voersien, hoe si alexander vergheuen souden Want haer vader hadt hem geseit Doe si saghen dat alexander ghenoech ghedroncken hadde, soe scencte die een ende die ander proefde den dranc daer noch gheen fenijnt in en was, mer daer na soe deden si fonteyn water inden wijn daert fenijnt in ghemenghet was, ende doe gaf men den coninc den nappe ende hi dranc, mer ten middel van sinen toghe soe ontfinc hi binnen enen anxsteliken steec, daer hi seer of wert veruaert, want het ghinc hem in sijn lijf of hi mit enen kniue ghesteken waer Ende doe kreet alexander mit groter misbaer, ende sijn vrienden waenden dat hijt van dronckenscap dede, Ende bleuen in dat wanen, mer het was een quade moert: Doe bat alexander dat men hem wech droeghe, Ende daer men wech droech was hi half doot, want hi wort van binnen soe torment, dat hi dicke eyschede een swaert om hem seluen doot te steken, ende sijn torment te corten, want sijn vrienden die omtrent hem stonden, ende handen an hem daden om hem te helpen die docht dat si hem soe seer daden als of si en ghewont | |
[Folio g5v]
| |
hadden Want cort te voren daer hi lach ende sliep hadde hem dit al ende wel ghedroemt Opten vierden dach sach hi wel dat hi steruen moste cort Ende hi seide dit nv ken ic mijn gheual want alle mijn gheslachte dat van achilles ghecomen is dat is al gestoruen omtrent sijn dertich iaer mit groten euelen Sijn ridders seiden dat hi verraden waer, ende si riepen al te lude ende iammerlic Ay layse wie heeft ons beroeft mit dus groten moert onsen coninc Ende die dit gheselscap ghescoert heeft die sel menighen man sijn leuen nemen Want des ghelijks en wert nye ghesien |
|