Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Alexanders feest ende sijn vermeten Ca. lvij

EEr anthipater quam soe voer alexander binnen ende buten soe hi woude ende hem ghenoechde, mer hem onsterf ensistien dien hi bouen alle sine prince minnede want dat was soe scoenen ionghelinc datmen in alle die werelt gheen scoenre vinden en mochte Ende alexander weender langhe omme ende dede hem een dier graf maken daer hi vele scats an leyde, want het coste hem te maken twalef dusent talenten van goude, nochtan dede alexander ghebieden datmen dese

[fol. g4r]

ionghelinc aenbeden soude voer enen god, ende daer voer houden Als dese iongelinc ter aerden was ghedaen, soe keerde alexander weder in babilonien ende daer lach hi in ledichede ende hi hilt grote feeste Ende daer ontfinc hi nacht ende dach die sloetelen ende die presenten die hem quamen wt allen landen, mer om dat die van roemen hem nv gheen present en senden soe swoer hi dat hi roemen soude varen slechten Ende om dat hi alle die werelt tonder hadde soe woude hi vorder oerloghen dan een mensche toebehoert, ende hi seide sinen luden dat si sinen raet doen wouden hi soude hem doen weten ende hebben die heymelicheit der natueren ende hi dede scepen maken tot dien dat hi noch hadde ende voer in die diepe doncker zee om der natueren craft te dwingen des balch haer die natuer die altoes mit hem gheweest hadde, ende die vier elementen mit haer, want die natuer voer ter hellen om helpe te soeken dat si alexander ter doot brenghen mochte Ende si vant daer hulp ende raet, want alexander wort vter zee te lande ghesteken ende quam weder in babilonien Anthipater die alexander ontboden hadde, was ghecomen in babilonien

[fol. g4v]

ende hi hadde drie sonen Die eerst hiet casander die ander philips, ende die derde yollas Dese waren mit alexander onthouden, om dat een altoes proefde den dranc eer datten alexander dranc Ende dan als hien gheproeft hadde so ontfinc alexander den nap ende dranc seluer Nv hadde anthipater doe maken so starcken fenijn, dat hijt wel seker was, hads alexander yet binnen dat hi seker doot waer, want dit fenijn was so starc datment niet houden en mochte in vaten van suluer of van goude noch van yser noch van mottael, noch in geen vat, sonder in een hoeue van een paert Anthipater was oec so seker dat alexander daer of steruen soude dat hijt seide casander sinen soen eer hijt fenijnt gaf den coninc dat hijt trijc van macedonien behouden soude Oec hadde hem anthipater wel voersien dat thessales alexanders fysisijn als men raet seide die hem te hulpe was om dese moert te doen