Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander tot babilonien quam Capit. lvi.

ALs alexander bi babilonien quam soe hiete hem een waersager dat hi inder stat niet en toghe, want daer lach sijn leuen aen Hier om soe liet alexander die poert staen ende voer ouer te effraten in een stat die bursya hiet daer doe nyemant binnen en woende Ende van alexanders vrienden die amoxarcus hiet die seide hem datmen ghenen waersaghers woerde gheloeuen en soude, want si pleghen veel te lieghen Om dese woerden soe voer alexander te babilonien binnen Doe seide corbanes die waersagher, gheen argher dinc is anden menschen om dat een man dicke plomper is om te doen sijn selfs oerbaer dan een ander Ende als alexander binnen der stat quam soe settemen hem een croene ghemaect van yuorie ende van goude Ende porrius leyden an die een side ende darius broeder an die ander

[fol. g3r]

syde Ende als hi te rechte geseten was soe quam groet volc voer hem, ende claechden hem ouer sijn baliuwen ende sijn ruwaerden, ende vraechden hem of sijn wille waer dat mense alsoe iammerliken tonder dede Als alexander dat hoerde so dede hi al sijn baliuwen doden vore die boden ogen Ende hier na nam hi staura darius dochter te wiue Ende hi hiet den gryeken oec dat si wouden nemen vanden edelsten maechden ende vanden scoensten die hem best behaechden van allen maechden die si wt allen landen ghebrocht hadden Ende hier na vraechden hi al dat ridderscap ende gout elken, ende gaf hem elcken scat ende groet goet ghenoech alsoet elc begeerde Ende die oude ridders scout hi quijt van oerlogen, mer in hoer stat settede hi ionghelinghen Ende die ionghelinghen seidenre seer teghen dat hi die oude ridders verliet, ende si baden hem oec dat hise mede verlaten woude, mer hi seide dat hi om bede noch om vrienscap verlaten en woude Die boden die hem ghesent waren van allen landen ende hem dat heerscap van haren lande op gauen si quamen voer hem mit ontallike scat ende ontallike presenten van gulden iuwelen van ghesteenten ende van siden werc van paer-

[fol. g3v]

den ende van wapenen ende van croenen Ende dese ontfinc hi al vriendelic ende hi gaf hem scoen presenten weder om haere pinen Hier en binnen sende hem olymphias sijn moeder letteren die spraken dat hi hem wachten soude van anthipater den verrader Want hi ontsacht haer dat hien verraden soude Ende als alexander dese lettere ghelesen hadde soe ontboet hi sonder beyden anthipater dat hijs nergent om en liet hi quaem tot hem in babilonien in der stat Hier om wort anthypater erre inden weghe daer hi te babilonien wert quam Ende dede maken een fenijnt dat inder werelt niet starcker wesen en mocht