Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander dat maechden lant wan Capittel lv.

DUs doeruoer alexander dat wilde Indien, ende quam nv daer hi porrius vant tot faciaten int eylant daer hi alexander ontbeyde mit alle den heer Hier soe beual alexander dien heren die hi dat lant van pertsen ende van meden beuolen hadde, dat si daden maken grote langhe scoene calumpnen van finen goude ende dat si alle sine yeesten daer in scriuen souden, ende dat sise by porrius rade voeren soude, in dat hoechste indien Ende dat sise verre ouer lyberbatus ende arcules palen setten souden Iae ende oec tien voet hogher maken dan haer palen waren want hi was dieper int lant ghetoghen dan si waren, mer nochtans verloes hi ontrent dusent ende vijftich man Seneca sprect van alexanders macht ende van sine stoutheit ende van sine ryke aldus Die coninc alexander

[fol. g2r]

was so fier dat sine verwaentheit ghinc bouen alle menschelicheit want toe hi die werelt ghewonnen hadde woude hi oec den hemel winnen Ende hem quam in sijn hoeft gelopen dat demetrius gheseit hadde dat veel werelden waren Ende alexander seide ay mi katijf dat ic binnen minen leuen een werelt niet ghewonnen en hebbe dat sel mi langhe rouwen Nv liet alexander in indien een ruaert ende voer wech tot babilonien wert Mer binnen den weghe dede hi tonder amasonien der maechden lant, soe dat si hem tribuut ende tynse gauen Ende in desen weghe quam hem die boetscap dat hem die boden brochten den seghe van al affryken ende die wouden hem op gheuen al hoer lant, ende brochten hem grote presenten ende haer tribuut was vander rykerstat kartaginen ende van spangen lant, ende van cecilien ende van gallen dat menighe mylen verre leyt, ende van ardennen ende van ytalien Ende dat alle dese sijns onbeyden in babilonien mit menighen groten present Doe haeste hi hem seer derwert, om dat hi alle die heerlicheit vander werelt ontfaen woude, als een heer daer bouen te wesen, want doe hi soe diep in indien gheuaren was, so seide dat volc vanden

[fol. g2v]

lande ghemeenlic dat hi nemmermeer steruen en mochte om dat hi soe verre ouer lyberbatus ende hercules palen ghetogen was Hier om en hilt hier niet veel of wat hem ten boeme gheseit was, want hi gheloefde bet anderen Ende dus wort hi bedroghen ende hi voer tot sijnre doot wert