Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van alexanders waentheden ¶ Capittel liiij.

DAer nae voer alexander wech, ende alle sijn volc, ende quamen in een dal daer veel serpenten in waren die den steen meranden draghen in haren hals die seer scoen waren, ende dat heer wanner menich Daer na quam alexander onder wonderlike beesten

[fol. g1r]

die hoefden hadden ghelijc leonen Ende daer mede quamen voghel grype die hem veel quaets deden, ende dat heer weerder hem teghen mit speren ende mit scutten starckelic, nochtans lieten si daer wel twee hondert man, Mer onder cleyn ende groet sloeghen si daer doot wel acht dusent beesten Hier na quamen si op een ryuier hiete ecclinas, ende dat water is derdalf mijl wijt, ende an elcke side stont groet lanc riet dat meerre ende langher was dan enich boem wesen mochte Ende dat riet lach al vol oliphanten, mer si en daden alexander noch sijn heer gheen quaet Ende alexander voer mit sinen heer ouer dit water mit scepen van ryede ghemaect Ende doe si alle ouer waren doe ontfinghense die wilden luden vriendelic alt heer Si vonden daer wilde wiuen in een water die schoen lanc wit haer hadden, ende schoen claer huden Dese wiuen plaghen dicwile mannen te vaen ende verdrenckense, of sloghense doot, of si brochtense ter doot mit hare grote luxurien Alexander vinc twee van dese wiuen, die een huut hadden also wit als snee Van daen quamen si saen opter ryuier ganghers die inden bibel fyson hyet Ende die coemt ghelopen vten pa-

[fol. g1v]

radijs Dese ryuier is soe wijt van datmen vanden enen oeuer anden anderen niet ouer sien en mochte Daer na quamen si dat si vonden beesten, die voer vten hoefde quamen hoernen die ghetant waren als een saghe Ende van dien sloeghen si doot achte dusent ende vierhondert ende een