Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe der manen boem alexander anderwerue antwoerde Capittel li.

ALexander ghinc inwert totten boem mit die drien, ende aenbeden den boem seer Ende hi peynsde ende begheerde te weten die stat daer hi in steruen soude Ende doe die maen begonde te rysen soe antwoerde hem

[fol. f7v]

die boem in griexer talen Alexander starc man dijn starfdach naect seer, want in naeste iaer ter neghender maent seltu steruen binnen babilonien inder stat, ende dat sel di doen een dijn vrient daer du des niet op en waenste Alexander weende harde seer ende sijn drie gesellen die mit hem waren, nochtan was alexander in twiuelinghe oft hem enich van die drien doen soude, ende hem berouwede dat hijs niet geuraecht en hadde, wiet hem doen soude Ende aldus ghinghen si wt eten mer alexander en mocht niet eten van droefheden voer dats hem sijn luden seer baden