Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander sijn eerste antwoert ontfinc vander sonnen boem Capittel l.

DIe paep seide tot alexander hebt v herte ende v ghepeyns voer v waer of dat ghi weten wilt mer en spreke niet mer peyns mitter herten ende siet opwert opten boem, ende hi sel v antwoerden soe wat dat ghi begeert te weten, want si spreken gryex ende ioedsche tale beyde te gader Die coninc ende sijn gheselscap wachten hem van quaden berade, ende si sagen ten boeme wert op Alexander peynsde of hi mit gheluc, ende mit seghe weder te lande keren soude Ende doe antwoerde hem den sonnen boem ende seide Alexander du selste alle die werelt tonder doen ende onuerwonnen bliuen van stryden ende een heer bouen alle die werelt wesen mer nemmermeer en coemstu weder

[fol. f7r]

te lande dit seide die boem in ioedsche tale mit cleenre sprake mer dit wort alexander misquaem herde seer, ende hem was leet dattet so veel van sine ridders hoerden, ende si begonden te wenen Ende alexander verboetet hem allen mit ghiften ende mit dreygen dat sijt nyemant en souden segghen dit, dat si ghehoert hadden Ende hi woude noch beyden om anderwerue antwoerde te ontfaen vander manen boem mer die paep seide hem dat dit niet wesen en soude voer die middernacht dat die maen rysen soude Hier om woude alexander daer beyden ende hi hilt mit hem perditasse ende filotine ende clitone sinen neue die nuwelinc tot gryeken ghecomen waren Want die maen seide hem wel dattet daer binnen nyemant doot slaen en soude moghen Ende hier om ontsach hijs hem te myn ende liet alle die ander ridders vten bosch gaen