Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Vanden wonder die in Indien sijn Ca xlviij

SI voeren bet tot Indien wert in, ende quamen daer si saghen naect volc, ende dat was acht voet lanc Die manier vanden volc was dat si waren altoes in die ryuier ende si aten raeu visch, mer doe si bet naerre trecken soude om dat volc te besien, soe doken si alle onder water Van daen toghen si in een wout, daer si luden in vonden die hoefden had-

[fol. f5r]

den ghelijc honden Ende daer sloech alexander ghetelden, ende sijn volc onstac daer menich vuer Mer dien so rees een storm groet so dat alle die tenten auerecht waeyden, mer alexander bat den volc dat si hem niet veruaren en souden want hi seide hem dat dit die goden niet en daden, mer het was den tijt vanden iaer dat doe sceyden den heruft ende den oest ende den winter Ende hi beual den volc dat si eten souden mer soe viel soe groten snee als scaepsvliesen op hem, als datter vijf hondert mannen of doot vielen Ende hier na viel groet haghel ende vier te gader ende binnen drie dagen hier na en conden si die sonne niet ghesien Alexanders ridders seiden dat dit der goden wrake was om dat een sterflic man soe coen was dat hi dorste varen ouer lyberbatus ende arcules palen ende hier na waren si gram Daer na quam alexander ten berghe van ethyopyen ende daer vant hi open lyberbatus hol, dat was in enen berch die al mottalen of gulden sceen mer wie int hol ginc die most binnen den derden dach steruen want als alexander in een lant quam soe vrachde hi of daer enich wonder in dien lande waer ende alsmen hem van enighe wonder seide soe woude hijt ymmer besien Hier gheviel dat hi ij.

[fol. f5v]

oude mannen vant doe hi in diep indien was Ende die seiden hem van twee boemen die voert int lant stonden Dat een was der sonnen boem ende dat ander der manen boem Ende die seiden elc wat hi begheerde te weten Als dit alexander hoerde, soe wort hi gram ende waende dat si dit gheseit hadden om hem te bespotten ende hi woudese doden, mer doe si hem swoeren dattet waer was soe nam hise mit hem ende voer derwert Ende doe hi daer int lant quam mit groter pinen soe vant hi daer alt volc gecleet mit huden van pantheren Ende sulcke huden leyden si onder ende bouen daer si sliepen ende en hadden anders gheen bedden Dat volc en at anders niet dan koelen ghemaect van edelen wyroec ende van balsame Want dit wasset in dit lant alte seer