Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander den binnesten indien wert voer Capittel xlvij

ALexander quam hier nae voer een poerte daer die poertiers binnen hoerde segghen datmen alexander mit wapen niet en soude moghen doden Doe visierde si een ander dinc ende scoten tot sinen volc wert mit veel fenijnder quatelen daer menich man of starft Ende ptolomeus alexanders vrient was hier of oec gewont soe dat alexander een cruut in droem gewijst wort dat al dat fenijnt van dien scoten verdreef Hier na quam hi tot enen hoghen berch daer groet volc op gheuloghen was Ende men seide alexander dat arcules bi wilen in dien berch was, mer een groet aertbeuinghe dreeffen van daen Dese borch wan alexander mit groter pinen, ende hi voer voert ende quam daer die gulden palen stonden die lyberbatus ende arcules setten tot een teyken dat si dat lant so veer wonnen Doe woude alexander weten ende besien of die beelde die daer stonden binnen hol waren of vol Ende hi vant dat

[fol. f4v]

si vol waren van fineerden goude ghemaect Hier na quam hi mit sinen heer daer hi enen grote starc beeste vant mit twee hoefden die ghetant was opten rugghe als een sage Ende dese beest beet hem twee ridders doot Ende dese beeste sloechmen mit hameren doot want gheen spriet en mach hem deeren Daer nae quamen si tot eenre ryuier ende daert heer sat ende at quamen veel olyphanten op hem ghelopen Doe beual alexander die van thessalen dat si teghen die olyphanten trecken souden ende dat si voer hem dreuen een grote cudde swinen want als die olyphanten horen gheluut vanden swinen soe vliegen si Aldus so sloeghen si doot achte hondert ende tachtich olyphanten Ende si sloegen hem die tanden wt ende voerdese mit hem, want dat is precioes yuoer