Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Vanden serpenten die alexander vreesden Capittel ses ende viertich

DOe alexander ghecomen was tot suueren water, soe sloech hi sijn ghetelde acht mylen lanc ende soe breet Ende hi dede vijftien hondert viue maken want dat ontsien bitende dieren seer Daer quamen doe alte veel

[fol. f3v]

scorpione ende therusten die veel quader sijn Daer na quamen ghinder menigherhande ander serpenten nv blauwe nv roede nv blonde nv sciere nv witte nv swerte nv ander die die huut gulden hadden Ende altehans wast wol gherufs dat dese serpenten maecten Daer na quamen serpenten binnen den tenten die cammen opt hoeft hadden, ende hadden som twe hoefden of drie, ende haer ogen die bernden als vuer Alexander visierde dat alle sijn heer hem betaelgien souden teghen dese serpenten, ende elc sinen scilt voer hem houden souden, ende spriete ende speren om hier mede die serpenten weder te staen In desen gheuecht verloes alexander xx. ridders ende lx. knechts Daer na quamen witte leone alsoe groet als ossen ende die sloech men doot mit sprieten Daer na quamen grote euere ende grote panthere opt heer Ende daer na quamen vleermusen mit groten scaren die alsoe groet waren als duuen Daer nae quam een beest meerre dan een olyfante al swert mit drie hoefden Ende eermen dit dier doden mocht soe haddet ses ende dertich gryeken ghedoot ende liij. ander mannen want het verscoerde al cleyn ende groet daert op quam Hier na quam opt heer musen die meerre wa-

[fol. f4r]

ren dan vosse Ende wat beesten dat die beten bleuen staphans doot, mer die luden mochten vander beten ghenesen Ende hier om dede alexander sinen leydsman doden