Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander voer doer die ruetsche villede Capittel vijf en viertich

[fol. f2v]

BInnen enen iaer gheuiel dit wonder Want alexander verwan darius in die meye Ende in die hoeymaent daer nae vewan hi porrius Ende inden oest hier na nam alexander mit hem hondert ende vijftich heren van Indien die alle die corste weghen kenden ende hi voer wech om dat hi alle die grote wildernissen woude sien van Indien Ende hi toech doer dat grote heer santachtich lant dat daer binnen leyt, want in dat lant vantmen eerst syden werc ende daer maectmen siden clederen In desen weghe hadden alt heer groot noot van dorst want si en vonden gheen water Mer int heer was een ridder die een helm vol waters hadde ghecreghen mit groter pinen ende die brocht hi mitten water alexander, dat hijs loen beiaghen woude Ende alexander nam den helm mitten water, ende storten al wt voer dat heer Ende dese vromicheit benam menighen man syn dorst Daer na quamen si tot eenre ryuieren die soe bitter was, dat daer man of beest of drincken en mocht Ende hier proeftmen dat een mensche meer liden mach dan een beest, want van groter noot soe licten si som cout yser ende som loet Ende van groter noot so licten ende droncken si som ozijn ende

[fol. f3r]

oly Omtrent noen quamen si bi enen berch daer si tvolc al naect binnen saghen Ende alexander bat hem dat si hem goet water wisen woude mer doe scuulden si alle neder ende men scoet ouer twater na hem, ende des decten si hem te meer Doe beual hem alexander om dat hem des volcs verwonderde twee hondert van sinen luden ouer die ryuier te swemmen mer doe si die twee deel ouer gheuaren waren soe verbetense die water paerden mit groter torment Doe wort alexander so gram dat hi hondert van sinen leytsmannen dede worpen inder ryuieren ende die water paerden haddense saen ghegeten Cort daer na vonden si luden die hem groet water wijsden mer als si totten water quamen, soe hadden si alle dien nacht ghenoech te doen om tegen die leeuwen te vechten ende teghen tygren ende beeren daer si hem mit pinen doer verweerden