Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van candax der conincinne Capit xliiij

HIer mede liep die mare, ende candax die conincinne van dien lande die seer behendich was ende subtijl van sinne Die sende een scildere, die wel beelden maken conste ende beual hem dat hi al sijn subtijlheit daer an leyde, dat hi alexanders beelde wel maec-

[fol. f1v]

te nae sijn ghedaente Ende dat hi dan dat beelde haer brochte, want hier te voren hadde haer alexander brieue gesent van groter vrienscap, si sende hem een grote presende van dieren houte, ende van gout ende van presiosen stenen, ende selseme dieren ende voghelen van menighe manieren Binnen dat dit gheuiel so quam candeles haer soen tot alexander gheuloeghen haestelic om salcoers, want hem wort sijn wyf ontroest Alexander sette ptolomeus in sijn stat, ende hi dede hem seluer hieten anthigonum enen maten ridder van alexanders scaren Ende ptolomeus ghebaerde hem voer candales of hi die coninc alexander gheweest hadde Ende hi seide tot alexander anthigonus vaer ende doet desen man salcoers ende wreken ouer sijn viande Alexander nam mit hem vier dusent ridders, ende voer mit candales der conincinnen soen ende hi vinc sijn viande ende verloste sijn vrouwe Hier om quam candales ende danctes ptolomeus seer dien hi ouer alexander hilt Doe begheerde ptolomeus als heer, dat hi begheerde sijn moeder te sien, mer hi woude an hem te voren senden anthigone, ende des was candales harde blide Dus voer alexander tot die conincinne can-

[fol. f2r]

dax als of hi anthigonus geweest hadde Als dit die conincinne candax vernam, soe quam si teghen haren soen, ende si ommehelsde alexander seer om dat si hem eer doen woude ende si leyden in allen steden in haer cameren ende toende hem veel rijcheden Doe antwoerde alexander dat hi wel veel meer rijcheden gesien hadde in gryeken dan hi daer vant Doe seide die vrouwe tot hem, mi denct ymmer dattu seluer alexander sijtste Ende hi seide vrouwe ic en ben niet Ende doe leyde si hem in die stat daer si sijn beelde gheset hadde, ende dedet hem sien ende seide Merct wel ende besich hieran dat die conincinne candax vroder is dan alexander Doe wort alexander soe seer ontsteken dat hi seer claechde dat hi daer ghecomen waer Doe seide die conincinne, neen en wes niet veruaert, du heues mine soen trouwe ghedaen ende ic sel di dat loenen Si hieten di anthigonus die willen, mer du biste mijn heer alexander Ende si brocht alexander weder in sijn behout sonder vrese, nochtans wou hi haren ioncsten soen ghedoot hebben want hi hadde porrius dochter te wiue