Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander die doncker zee bestont Ca xliij.

ALexander wort van sinen vrienden vter stat ghedraghen ende si beclaechden seer Ende alle dat volc dat binnen der stat was groet ende cleyn sloeghen si doot Hier ghedochte alexander alte grote smerte eer hi ghenesen wort mit arsaterie Ende hier bekende hi ende seide al hout mi alt volc dat ic iupiters soen ben dese wonde leert mi dat ic een sterflic mensche ben, want hi conste qualic ghenesen Ende doe hi ghenesen was, soe bereyde hi hem

[fol. f1r]

saen om voert te varen, mer hi sende mit enen sconen heer polipertoene in babilonien want hi was mitten heer verladen, ende hi was seluer berade dat hi die grote zee sien woude ende hi ghinc te sceep om dat lant te besien datter binnen lach Sinte augustijn seit dat hi op die zee vinc een hoeft roeuer die dyometes hiet Ende alexander vraechde hem wat verwoetheden datten daer toe iaechde dat hi mit scepen inder zee voer roeuen Ende dese roeuer antwoerde hem, wat duuel iaecht di dattu alle die werelt doer roefste, want om dat ic mijn auontuer mit cleynre menichten, soe hietmen mi dief ende roeuer, mer di soe hietmen coninc ende heer, om dattu meer volcs hebste, want alsmen gherechticheyt afterlaet soe en ist conincrijc niet anders dan dief ende groet roef, mer dat wi roeuers hieten dats om cleynen roef ende cleynen moert