Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander in een stat spranc Capit. xlij.

[fol. e6r]

NV dede alexander al sijn heer mit goude decken alsoe hi begheerde alle sijn pingieren ende sijn bannieren dede hi van goude maken si hadden daer so veel gouts dattet die ridders niet voeren en consten, nochtans ghinghen mitten heer dusent olyphanten geladen mit goude Al der beesten gesmide was gulden, ende het blincte harde verde mitter sonnen Ende alle die waghenen vanden heer waren ghemaect mit scarpen sekelen Alexander hadde in sijn heer twalef hondert carren die den heer volchden Ende hi hadde dertich dusent stoute ridders te orse, die in elcker noot vroem waren Voert hadde hi driehondert dusent man te voete, ende op vijftich starcke mulen voerde men des conincs harnas Daer waren oec veel kemels buffele ende dromedarien die den heer nae droegen fytalie, mer den last daer of en mocht men niet vertellen Alexander seluer voer, voer sine bannieren ende verwan vierehande volc, mer doe wouden alle die heren van gryeken weder te lande wert keeren Daer sprac hem alexander soe vriendeliken toe, dat si hem gheloefden mit hem te varen waer dat si wouden Doe quam alexander tot eenre scoenre ryuiere, ende

[fol. e6v]

daer doer voer hi in die zee in een eylant daer hi dat volc dwanc dat daer ercules gheset hadde wilen dat hi indien wan Dit volc was seer starc ende fel ende quam fellic tegen alexander met xxxi.M. man te voet ende lx.M man te orse mer noch dwancse alexander mit striden so dat si ontuloegen in een stat die subdratas hiet Ende daer beleide hise binnen Hier clam alexander eerst op die muer ende spranc in die stat ende dat weerde hijt teghen menighen man, mer daer wort alexander ghescoten mit eenre gaueloete beneden die spene van enen man van binnen, mer die man dien scoet die starf daer om Ende alexanders volc quam in ghesprongen ende halpen hem vter noot