Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Porrius rijcheit ende macht ¶ Capittel xli.

ALexanders hystorie seit dit vanden campe als voerseit is Mer iustinus bescrijft dat porrius was van alexander

[fol. e5r]

seer ghewont, ende oec gheuangen in dien strijt daert ors pucifal in doot bleef Ende dat porrius hier om soe droeuich was datmen hem qualic verbliden mochte dat hi hem liet genesen ende dat hi ate ende droncke Ende doe porrius ghenesen was soe gaf hem alexander sijn lant weder mit payse Hier na liet porrius maken in alexanders eer drie steden Die een hiet alexandrien, die ander pucifaline nae alexanders ors naem dat porrius doot sloech Ende die derde stat hiet nycia Porrius hadde in sijn heer viertich dusent man te voet ende acht hondert waghenen, wel ghebatseliert ende ghemannet, ende in allen siden waren scarpen sekelen daer aen ghemaect die seer sneden Ende hier toe hadde hi vier oliphanten die wel ten stryde gheleert waren om die betaelgien mede doer te breken Ende elc oliphante hadde een starcke toern op daer ghewapende luden in waren ende scutters Ende dien toern waren wel ghespijst binnen ende dit was een starc heer Porrius had oec een sael die xxx. columpnen lanc was, ende hadde mathijs ghewracht al van finen goude Ende die wande daer of waren al mit goude ouer ghedect vinghers dicke, al ouer ende

[fol. e5v]

ouer daer en binnen hadde hi een wijngaert mit rancken daer die scoten ende die blader van ghemaect waren van mathijs al van finen goude Ende die druuen waren ghemaect van mitande ende van cristalle Daer waren an gemaect alte vterlike asemant cameren ende slaep cameren daer die wande alte vterlike ghemaect waren van finen goude Daer waren in gheset carbunculen ende ander preciosen stenen Die doren van desen palase waren al yuorien, ende die balken waren al van ybenen hout, ende dit palaes was al ouer ghewolcht mit supresse Ende daer stonden in ghemaect veel beelden, groet ende lanc van finen goude nochtan en waren si van binnen niet hol Ende elc beelde hadde in die hant enen cop van finen goude Daer stont oec binnen een platamis van finen goude die groet ghenoech was in die ghelike als of een gulden lynde gheweest hadde Daer waren oec veel nappen van preciosen stenen ende van cristalle, ende daer waren oec veel ongheloeflic scats, ende veel duerbaer stenen, ende onuertallike veel dieren crude Ende al dit grote goet dat quam alexander al in sinen handen