Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt
(1477)–Anoniem Die hystorie vanden grooten Coninck Alexander–
Auteursrechtvrij
[Folio e3r]
| |
Iustinus seit doe alexander in indien quam, soe dede hi sijnre ridderen gesmide van haren scilden sulueren maken ende oec haers harnas Ende cort hier nae, soe quam hi voer een stat hiet misa, mer dat volc dat daer binnen was, en wouden hem niet weren, want si verlieten haer op haren god liberbatus Hier om hiet alexander datmen die stat vermyden soude Ende hi hilt daer bi legghen mit sinen heer an een berch diemen heylich hiet, ende dat en is niet verre vander poerten Op dien berch wastet alte scoen mit wewende ende wijngaert al ouer sonder enich oefenen Van deser stat voer alexander in eenre conincinnen lant die cleophilips hiete Dese vrouwe gaf haer op in alexanders hant, mer si brede haer seluen saen ende dede alexanders wille Ende hier om gaf hi hare lant weder ende haer vryheit Alexander wan an dese vrouwe enen soen die si alexander hiet, ende hi wort namaels coninc van indien Ende porrus vergaderde mit hem een groet heer om te stryden teghen alexander Ende alexander toech vast teghen hem te stryden, ende beyde die betaelgien vergaderden ende an beyden siden bleef groet volc doot | |
[Folio e3v]
| |
Ende int vergaderden vanden stryde soe reet porrus pusifal alexanders ors doot Ende alexander wort seer veruaert ende drouich om sijn paert, want hi was doe seluer in groter auentueren Ende die gryeken quamen toe slaende haren heer te help daer hi te voete stont ende daer bleef menich man doot ende ghewont doch holpen si alexander vter noot. Mer hi liet alle weer staen ende gheuecht, ende nam pusifal biden stert, ende toecht an die een side Want hi ontsach hem dattet die van Indien gheroeft souden hebben, ende dat en had hi om gheen goet ghewilt Dus toech alexander afterwert, ende men maecte tusschen beyden een bestant twintich dagen durende want binnen dier tijt machmen ghenesen die gewonde ende die doden ter aerden doen nae haerre waerdicheit |
|