Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander calistenes dode Capittel xxxvij

HIer nae doe alexander weder becomen was ende hi weder begonde te oerlogen soe verwan hi twerehande volc die hem op gauen ende brochten hem ghiften Doe gheboet alexander daer datmen anbeden soude als een god Ende calistenes laecte hem dit ende seide dat hi pensen soude dat hi sterflic waer Hier om wort alexander gram ende toech hem an dat hine vernomen hadde dat hi en verraden soude Ende hi dede hem alle sine leden of snyden sijn nose ende sijn oren ende sijn lippen, soe dat elcken mensche ontfermde dien

[fol. e2r]

sach Ende daer na dede hi en sluten als een mute mit wilden honden om datse hem verscoeren ende verbiten souden Ende om dat die luden desen souden sien in deser pinen hem veruaren souden Lysymagus een ridder die calistenes discipel plach te wesen in sijnre scolen hi hadde ontfermenis op sinen meester dat hi en in deser pinen sach Ende om dat hi sine pine corten woude, so gaf hi hem een cop mit fenijnden dranc om dat hi te eer steruen soude Hier om soe balch hem alexander ende dede hem werpen voer een leeu, nochtant so liet die leeu desen ridder leuen ende dus verhief alexander hem seluen Ende om datter veel van sinen groten heren, niet en wouden ouer god ontfanghen soe dede hise iammerliken doden ende hi seide hem alle verradenisse an