Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander cliuise doot sloech Ca. xxxvi

EEns sat alexander in een feeste ende hi sat ende at ende dranc mit sinen voerbarighen heren soe dat hi al droncken wert Ende men wert ghinder sprekende van philips alexanders vader Ende die heren begonden philips te prysen, mer alexander prees hem bouen sinen vader ende verhief hem harde seer Ende dat meeste deel vanden heren warens hem mede, om dat si hem lieue woude seggen mit sinen carnien Mer daer was een ridder die clitus hiet, ende hi peynsde hi soude die waerheit seggen hi balchs hem die woude ende hi prees veel meer philips Doe wort alexander op hem gheporret mit gramscappen ende greep een speer die een knecht in sijn hant hadde ende doer stac dese clitus die een out vroem ridder was Ende doe clitus doot lach riep alexander tot hem aensiet wat di philips nv helpen mach Mer des anderen daghes doe hi nochteren gheworden was, ende ghedochte wat hi ghedaen hadde, soe woude hi hem seluen doot ghesteken hebben van rouwe ende hi ginc ende woude clitus cussen Ende en haddent hem sijn vrienden

[fol. e1v]

niet benomen, hi hadde hem seluen op die seluer stede doot ghesteken, want hi bedacht hem seluen dat clytus suster sijn amye was Ende dat hi oec om dese selue saec ghedoot hadde permemoene ende faloton ende veel ander luden van sinen ghenoten Dit ghinc alexander seer claghen, soe dat hi in veel daghen niet en at tot dat hem verboden sijn heren dat hi ate Ende sonderlinghe calistenes sijn gheselle die mit hem voer aristotiles ter scolen ghinc Ende die was seer wijs ende hi was cortelic tot alexander gecomen om hem te raden