Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Die wraeck van darius doot Ca. xxxv.

ALexander seide tot sinen ridders ghi heren ic ben blide, ende harde vroe dat darius mijn viant aldus doot is ende oec ben ic den genen dien ter doot ghebrocht heeft om minen wille groet eer ende groet loen sculdich ende dat soude ic doen op dat ic wist wie dat si waren Daer om bid ic of si hier sijn die dus veel om minen wille ghedaen hebben dat sijt mi nv openbaeren, want ic meense hoghe heren te maken doe dit bessus ende narbasmes hoerden

[fol. d8v]

soe worden si blide, ende quamen beide te gader voert ende lieden dat si desen moert ghedaen hadden Ende doe dedese alexander beyde wel hoghe hangen Ende hi seide dat hi niet besworen en waer, ende dat hi oec niet en loghe want hi maecse hoghe heren Daer wort oec een ander gheuanghen die den raet ende den moert van darius toe bracht Ende dien leuerde alexander darius broeder ter wraken Ende alexander toech doe haestelic op terdus die scone riuier Ende daer dede hi een grote stat op maken binnen xxij. dagen die na hem alexandrien hieten dede, ende hi muerde een muer al omme die stat die ses mylen lanc was, ende hi vergaderde volc wt enigen steden die cyrus bi wylen gemaect hadde ende dedese in deser stat wonen Men vint oec bescreuen dat alexander elke iaer een stat maken dede die hi alexandrien hieten dede Ende dat waren xij. alexandrien inden xij. iaren dat hi regneerde Ende in sulc van desen steden liet hi luden van sinen heer die te cranc ofte out of te pijnlic gheworden waren Ende hi dede inder mueren vanden steden houden dat die steden alexander iupiters soen hadde doen maken, mer dit was een sotte stoutheit dat hi hem seluer ouer god hilt, die leuen

[fol. e1r]

most mit spise ende mit dranc