Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander die tien gheslachten van ysrahel besloet Capittel xxxiij

DOe alexander ghecomen was ten berghe van caspien, soe sende die tien gheslachten van ysrahel boden an hem Ende si baden oerlof dat si teghen hem wt trecken mochten Ende alexander vraechde die sake waer om si soe gheuanghen waren Ende doe men hem seide dat si gode openbaerliken gelaten hadden van ysrahel, ende hadden een gulden calf aen ghebeden, ende dat hem god propheten te voren gheseit hadden datse hier

[fol. d7v]

om souden worden gheuanghen gheuoert datsi nemmermeer wederkeren en souden Doe antwoerde alexander dat hise noch nauwer besluten soude Ende doe dede hi die nauwe weghe van die gheberchte bemueren Ende doe hi sach dat dit werc omleyt was om te volmaken mit menschen pinen, soe bat hi god van ysrahel dat hi dit werc volmaken wilde Hier na te hant ghinghen die roken ende die berghen die een an die ander soe datmen daer nemmermeer ouer comen en mach Ende hier wort gheopenbaert dat god niet en woude dat si nemmermeer wt quamen Nochtan seit men dat si wt comen sellen biden eynde van der werelt ende si sellen groet volc verslaen Daer god dus groten daet dede van enen quaden mensche wat sal hi dan doen om den goeden menschen