Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe alexander sijn seden verwandelde Ca. xxxij

ALs darius doot was ende begrauen so hief op alexander die seden van pertsen an sijn cleder ende an sijn ghewaden ende hy droech die crone van pertsen, ende liet varen die castume van macedonien Ende dit beual hi sinen boden seluer te doen dier nochtans tegen seiden Hi ghinc houden veel wiuen ende amyen die scoenste die men vinden mochte Ende daer mede lach hi dach ende nacht so hem goed dochte Hi wort oec alte gulsich van spise ende van dranc om dat hi woude dat die luxurie niet meerren en soude hadde hi ghemaect gheweest van spisen Hi maecte spele in sinen werscap ende vergat seer sijn wijsheden want hi en mickede des niet dat sijn rijcheden sijn goede seden versmoerden Hi wort als een tyran op sijn volc ende als een viant ende hi balch hem seer als hem yemant seide dat hem mistont hi hads groten toern datmen hem philips sone hiet ende datmen hem seide dat hi den sede van sinen lande verleit

[fol. d7r]

hadde Ende hier om worden ghedoot fylotes ende pinenion sinen vader, aldus soe en maect grote rijcheit nyemant goet, mer si versmoert goede seden Hier na wan alexander sychem ende alle die luden die onder den berch tantalus al om ende omme gheseten was, want dit was wilt volc ende onwetende ende nye en constese yemant bedwingen, mer alexander dwancse alle Hier na quam hi ten berge van caspien, daer die tien gheslachten van ysrahel in besloten sijn want also hier voer inder coningen boec gescreuen is soe leuerdese god om haer sonden wille salmanasar den coninc van assyrien ende die voerdese hier ende brochse wt haren lande