Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van phylo anaxinines ende van ephiturus Capittel xxxi

TOt dien tiden was anaxinines seer uermaert van wijsheden ende hi leerde alexander in sijnre ioecht wijsheit ende doghet Ende het gheuiel dat alexander vellen

[fol. d6r]

woude die stat daer anaxinines wonachtich in was Ende anaxinines ginc vter stat tot alexander om een bede te bidden, mer alexander swoer dat hi op dien dach gheen bede om hem doen en soude Doe sprac dese wise man, nv bidde ic di dan dattu dese stede slechte, ende aldus verkeerde hi alexander van sinen quaden sinne mit subtijlheden, want alexander hielt sijn woert, ende en dede sijn bede niet, ende dus bleef die stat staende die alexander meende te vellen Tot desen tiden was ephicurus oec tot athenen vermaert inder stat mer hi dwaelde in enighen saken want hi seide dat die meeste salicheit vanden menschen waer in weeldicheden van vleysche Hi seide oec dat god dese werelt niet en achte ende dat die sielen steruen mitten lichaem ende hi seide oec enighe goede punten want hi seide wie wijsheit wil crigen die moet alle weeldicheit laten varen want wie der naturen recht leuen wil hi en mach niet arm werden want sulcke comen van groter armode tot groten goeden mer dan beghinnen si eerst haer katiuicheit Hi seide oec die ergent eten sel hi besie oec mit wien hi eten sel ende wat hi eten sel Dat beghin van alle doecht dat is dat een sijn misdaet bekent ende dat hi altoes pense dat hi ster-

[fol. d6v]

uen moet Een en sel sijn leuen niet ouergeuen tot ouer aet noch ter gulsicheden, mer hi sel keeren ter wijsheit ende te ghemaeticheden want van weeldicheden coemt dicwyle onbaet ende euel ende grote siecheit.