Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Van darius graue Capittel xxx.

NV wil ic voert scriuen hoe darius graf ghemaect was Ende daer waren in ghescreuen ende gheteykent alle die lande van der werelt ende vanden yeesten Appellas was meyster van desen graue ende het was aldus ghemaect Het was van tween sarcken van marmorsteen die groet goet ghecost hadden ende waren seer lanc ende dicke ende effene Opten ondersten steen maecte hi wasseken of lijsten binnen den cant vanden sarcke van scoenen latoenen Ende opten vierhoeken maecte hi vier sulueren columpnen dicke ende starcke ende wel ghewrocht, mer die hoeke waren gulden wel ghesuuert ende seer vterlic ge-

[fol. d5r]

maect Dese waren ten vier hoeken ghesoudeert opten ondersten sarc mit metale Op dese vier columpnen leytmen den anderen sarc die was van witten marmorstene Op dese sarc hadde appellus gesoudeert al doer brede waesken van finen goude, ende daer in hadde hi ghewrocht die ronde werelt ende in drien ghedeylt ghelikerwijs als hier beneden staet

Asyen		Sem
	Iaphet		Cam
Europen				Affrica

Aldus is die werelt in drien ghedeylt want asyen hout alsoe veel als beyde die ander pertyen In elcken van desen pertyen hadde appellus ghemaect ende ghegrauen alle die steden die daer binnen waren Ende alle die ryuieren die daer binnen liepen, ende wat volc datter binnen woende, ende mit wat tongen datmen daer sprac, ende die groete woude die daer binnen laghen ende oec alle die eylande vander zee ende hoe si hieten Dit hadden si soe properlic

[fol. d5v]

daer an ghewracht van weuen, dat een mensche hadde gheweest wt al der werlt hadde hi bi deser tumben ghestaen hi hadde ghescien ende moghen mercken den rechten wech tot sinen landen wert Oec hadde hi daer ane ghewrocht dier yeesten vanden beginne der werelt ende die stryde Ende hoe alexander darius verwonnen hadde Die landen te noemen laet ic hier after om dat ic corten wil Al dit werc hadde appellus oec begrauen ende gemaect mit eenrehande beesten ende dieren diemen vant Ende hi hadt al ouer gedect mit enen werke dattet lichte ghelike enen cristal, mer het was veel claere ende scinende geliken der sonnen van claerheden Hier doer sachmen alt werc Ende darius verteerde daer hi in ghebalsent lach mit dieren crude ende specien An desen tumbe stont oec ghescreuen hoe langhe die werelt ghestaen hadde tot dat alexander coninc wert dat was acht ende viertich hondert iaer xxx. iaer myn