Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe darius van sinen luden gheslagen wert Ca. xxviij.

IOsephus seit doe alexander liden woude voer darius, doer die poerte van caspien soe toech hi doer panfilia, ende daer most hi liden doer een groet ryuier ghelijc enen arm vander zee ende daer dede god wonder, want dat water vander ryuier sceyde hem in tween Ende alexander reeter doer op ten droghen gronde mit alle sinen heer, ende dit liet god gescien om dat hi mit hem breken woude die macht van pertsen Orosius ende iustinus segghen dat alexander in desen les-

[fol. d3v]

ten stryde of wan mit moghentheden dat rijc van pertsen ende van meden Want hi en vant nyemant die teghen hem voertmeer dorste steken of setten teghen hem In dese vaert wan alexander meer gouts ende roefs dat nyemant gelouen en soude Hi wan oec persipolia dat die hoeft stat was vanden lande van pertsen Dese stat hadde langhe ghestaen in vreden ende was wel van groten goede des hem nyemant en bewant, ende dat quam al in alexanders handen Nv ghinc darius vlieghen wt die eenre stat in die ander stat, ende waende erghent in vreden sijn Ende darius hadde mit hem twee valsche princen die hieten bessus ende nabasmes die droeghen ouer een, ende beghinghen darius daer hi heymelic was, ende wonden ouer doot ende lieten legghen ende vloghen haestelic wech van hem, totter tijt dat si wel verstonden ende wisten hoe dattet mit hem vergaen was Alexander vernam dattet darius aldus vergaen was ende datten sijn luden ghespannen hadden in gulden vingherlinc Ende hi reet derwert haestelick den naesten wech die hi varen mochte, ende hi quam tot darius soe dat hi en leuende vant Ende hi gaf hem alexander op in die hande. Ende nam hem mitten

[fol. d4r]

knyen ende sprac hem toe soe hi best mochte