Die historie dat leven ende dat regiment des alre grootsten ende machtichsten coninc alexanders die heer was ende prince alle der werelt

¶ Hoe darius an alexander screef om genade ¶ Capittel xxvij.

DArius hadde nv als sijn hope verloren ende hi viel in sijn sael op die aerde ende dreef iammerlic misbaer Hier na hadde hi raet dat hi dus an alexander screef Aen alexander sinen heer darius saluut ende eer, het waer wel ghedaen ende edelheit woutste hem ghenade doen, want die auontuer heeften di tonder ghedaen machtelic inden velde Ic bidde dattu ontfermes mijnre moeder ende mijnre kinder alsoe di betaemt Ende dijnre goedertierenheit toe behoert ende dat ghise ons wilt weder senden Ende om die weldaet sel ic di gheuen al mynen rijck ende vorder scatte die verborghen leggen onder

[fol. d3r]

der aerde Ende daer toe dat rijc van pertsen ende van meden Ende alexander seide hi en dedes niet Doe ontboet darius pouram den coninc van indien dat hi hem te hulpe quame teghen alexander ende hi soude hem daer voer gheuen onuertallike scat Dit vernam alexander ende haeste hem dat hi quam ter poerten wert eer darius te indien wert voer Ende alexander toech doer, dat is ouer gebercht doer een cleyn gat want buten en leyt gheen wech Ende binnen den somer en is gheen man die daer doer derf gaen om dat daer so veel serpenten sijn nochtan en isser gheen slot voer van yser teghen heer noch tegen volc