Dat .vi. capitel. Van Brabon Ansises sone den eersten kersten prince in Brabant, ende hoe hi die stadt van Landen makede ende meer ander dingen
BRabon coninc Ansises sone dair int voorscreuen capitel af geseit is wert te sinen .vij. iaren de eerste prince in Brabant ende hi woonde op Haspegouwe, ende dede dair maken een schoon stat die doe seer groot was ende heet Landen om dat hi dair eerst landen, ende hi was oock marcgraue des heylichs rijcx. Ende als hi out was .xx. iaren, so quamen die onghelouige Huynen ende Goten in sijn lant die alte veel landen destrueerden Attila der Huynen coninc die gheessele gods geheten ende een tyrant seer wreet die lange tijt veruolchde tmenschelijke geslachte Ende ten lesten sterf hi seer onsalichlic also die tyrannen plagen Des gelijcx persequeerde Gasericus der wandelen coninc den kerstenen in veel landen Hi was een Arriaen ende hi nam Rome ende destrueerde Affriken. Ende in dier tijt sterff sinte Augustijn eens deels van drucke Jnt iaer ons heren .CCCC.xl. Ende want Brabon voorscreuen niet sterc genoech en was om de ongelouige te wederstaen, so tooch hi met sijn wijf ende met sijn familie totten keiser Archadius ende Honorius, ende hi bleef here na sijn vader li. iaer Omtrent dese tijt begonsten die Vriesen in Engelant te comen, ende allencxkens wassende so creghen si al dat rijcke ende crone. Ende sinte Nicasius eertsbisscop van Riemen ende Eutropia sijn sustere metten Riemschen volcke werden gemarteliseert vanden Huynen
Auteursrechtelijk beschermd
