Van Brabant die excellente cronike

[fol. 52r]

Dat .v. capitel. Vanden tweeden deele deser cronijken is van Ansises den .xij. coninc van Agrippinen daer den boom oft linie op beghint

Hoe Ansises geuangen wert ende verdreuen van keyser Graciaen. Ende van Brabon sijnen sone.

ANsises die .xij. coninc van Agrippinen, dat is van alle den lande van opten Rijn totter Schelt toe, daer brabant in begrepen is ende marcgraue des heilich rijcx, sone van coninc Karle mitten corten nase, also hier voor geseyt is, begonste te regneren int iaer ons heeren CCC. ende .lxxviij. ende hi regneerde .xxx iaren ende was heyden als sijn voor vaders Ende doe waren keyseren Valentiniaen ende Graciaen Ende om dat die Francken die in Hongherien woonden seer wiessen ende verstouten om die grote vryheyt die Valentiniaen de keyser hem gegeuen had, so vreesde Graciaen die keyser datse alte machtich souden werden, ende so wilde hijse weder eygen maken ende dwingen tot tribute Ende doe lieten die Francken Hongerien dat doe Pannonien heet ende haer stadt van Sicambrien ende quamen met al haer volck ende met haren prince oft hertoge geheten Priamus tot opten Rijn ende maecten daer veel steden ende borgen, als Franckefoort, Bonne, ende meer ander, ende si besloegen tlant vander Denouwen tot op

[fol. 52v]

den Rijn Ende van dese Priamus (die van Hectors van Troyen bloede comen was) sijn gecomen de coningen van vrancrijck tot dat die cleyne Pippijn des groten coninc Karels vader bi consente vanden stoel van Rome ende bi rade vanden landen coninc van vrancrijke gemaect wert Die welcke die Fransche crone weder bracht aen sijn geslachte, twelc was ge[co]men vanden coningen van Agrippinen, die besaten tlant dat naemaels heete oostvrancrijcke ofte Lothrijke, te weten vanden Rijn nederwaert tot desen landen Ende als Graciaen de keiser de Francken dus verdreuen had wt Hongerien so wert hi denckende op de coningen van Agrippinen hoe dat si schoon priuilegien hadden die hem Octauiaen verleent had den voorscreuen Kaerle sinen neue den .ij. coninc van Agrippinen ende meendese te breken ende quam met grooter machte tot Straesborch ende dair beuacht hi coninc Ansises ende vinck hem ende voerden te rome, daer hi lach gheuangen .vij. iaren om dat hi sijn priuilegien niet en wilde ouer geuen Ende daer hi dus lach geuangen began hi ten lesten te dencken dat hi in sijnre stadt Agrippina, dats Colen, dicwils had horen seggen dat die bisscopen ende priesteren der kerstenen leerden datmen in christum gods sone gelouen soude, ende wie in hem geloofde dat hi hem holpe ende bistonde in allen noden Ende dit denckende riep hi Christum aen ende geloofde mocht hi weder te lande keren hi ende al sijn volc souden kersten werden. Ende niet lange daer na verleende god dat Graciaen die keyser sterf ende na hem wert keyser Theodosius, alsmen screef .iij C. lxxxvij. Ende dese keiser liet Ansises vter geuangenis, om dat hi hem soude helpen wederstaen den coninc van groot Britanien, want hi wilde Theodosium verdriuen ende selue keyser werden Ende doe Maximiaen dat vernam so tooch hi in Ansises rijke ende destrueerde sijn lant ende wan de stadt van Agrippinnen, dats Colen, ende daer vandt hi Ansises wijff die coninginne met eenen sone die .vij. iaer out was ende hem ontfermde dies edel kint ende liet kersten doen ende wert Brabon geheeten om des wille dat die grote heren wt Troyen geboren voortijts Brabon heeten. Ende Maximiaen gaf desen iongen Brabon tlant dat hi genomen had tusschen Mase ende Schelt. ende na hem wert tlant Brabant gheheten Ende maximiaen tooch voort in italien tegen Theodosium, daer hi vanden keyser bleef verslagen Ende doe nam coninc Ansises oerlof aenden keyser ende quam te sinen lande weert Ende als hi te Tours quam vant hi daer sinte Martijn den heiligen bisscop ende ontfinc tkersdom van hem ende al die bi hem waren, ende hi vant al sijn lant verdestrueert van Maximiaen. Ende doe hi vernam dat Brabon sijn sone woonde tusschen Mase ende Schelt ende dat hem Maximiaen dat lant gegeuen had ende Brabant was geheeten, so tooch hi tot hem ende was wel te vreden dat hi kersten was met sijnen volke Ende coninc Ansises nam sijn vrouwe ende tooch tot Agrippinen ende dede die stadt vermaken ende al sijn volc kersten doen. Dair na creech hi van sijn vrouwe twee kinderen, een sone dien hi hete Karel ende bleef coninc na hem, ende een dochter die heet Voraya ende nam tot een manne Herman graue van Dordane, dat nv heet Dormonde, ende dese Heyme wan aen Vorayen .iiij. sonen Reynout Rogier Oliuier ende Adelaert, ende dit heeten die vier Heyms kinderen ende

[fol. 53r]

voeren striden met Kaerlen haren oom coninc van Agrippinen tegen die Hunen ende Goten ende werden gemarteliseert Sinte Reynout leyt te Dormonde verheuen Ende sinte Adelaert leyde alte heiligen leuen in dabdie van Corbie in Vrancrijck. Ende so wert al voor logen gehouden dat men in somige boecken leest van desen vier Heyms kinder Ende sonderlinge ist gelogen datmen seit datse bi grote coninc Karels tijt waren, want groote Karel quam wel .ij.C. iaren daer na. Mer haer oom was de voorscreuen coninc Karel van Agrippinen. etcetera.

Hier is te weten dat de coningen van Agrippinen na desen Ansises hem niet meer en scriuen Marcgrauen des heylichs rijcx, want tmarcgraefscap bleeff voort aen met Brabant den voorscreuen Brabone coninc Ansises sone den eersten kersten prince in Brabant coninc Karels van Agrippinen broeder

Jn dees Ansises tijde so sadt die coninc der Francken opten Rijn Priamus van Hectors geslachte ende Francions zijns soons ende waren verdreuen wt Sicambrien want si den keyser geen tribuyt meer geuen en wilden Ende men screef ons heren iaer .CCC.lxxxi. ende hi regneerde vijf iaer. Somige boecken wt wisen dat dese Priamus ende Mercomyrus sijn sone geen coningen en waren, maer alleen hertogen, ende dat Pharamundus dye eerste was. Want als die Francken een wijl tijts op den Rijn gheseten hadden ende seer vermenichuoudicht waren so en wouden si niet langer hebben dat huer ouersten hertogen souden heeten, maer wouden ooc een coninc hebben, want andere landen die min volcs ende min van machte waren coningen hadden. Ende maecten ende coren onder hem tot eenen coninc dese Pharamundus des voorscreuen hertoge Marcomirus soon, ende dit was die eerste coninc der Francken

Na den voorscreuen Priamus regneerde Mercomirus sijn sone ouer die Francken opten Rijn wonende. xxxiij. iaren, ende si streden tegen .ij. roomsche capiteynen bi Triere die si verwonnnen. Dese Mercomirus wan Pharamunde den derden coninc of bat geseit den eersten gecroonden coninc ende die regneerde .x. iaren. Jn dees Paramundus tide so sterf die voorseide coninc Ansises van Agrippinen, te weten int iaer ons heren. CCCC.xxvij. ende Kaerle sijn sone bleef na hem die .xiij. coninc van Agrippinen.

Hier laten wi die coningen van Agrippinen varen, want si totter Brabantscher gesten niet meer en horen. Ooc so verloos die .ij. coninc na desen tconincrijke van Agrippinen, want dye voorscreuen Pharamundus ende die Francken wonnent metten sweerde, ende oock cregen si tlant van Gallien, twelc nv Vrancrijcke heet, also hier verclaert sal werden

Jn desen tijde leefden dese heylige santen corts deen na den anderen. Als sinte Jheronimus cardinael een van den vier leeraers, sinte Basilius, sinte Martijn eertsbisscop van Tours, sinte Ambrosius eertsbisscop van Melanenen een vanden vier leraers, sinte Jan guldemont eertsbisscop van Constantinopolen, sinte Alexius, sinte Augustijn een vanden vier leeraers, sinte Seruatius bisscop van Tongeren die was van sinte Annen gheslachte, sinte seuerijn eertsbisscop van Colen

[fol. 53v]