Van Brabant die excellente cronike

Dat eerste capittel Vanden beginne der Troyanen tot Brabon ende Karle beyde kinderen van Francio.

DJe afcoemste ende edelheit der hogher vorsten ende hertogen van Brabant sal ick kenlick maken. So is te weten, dat van beginne dat god almachtich die eerste menschen maecte Adam ende Eua opten vridach, so warent ontrent xij. hondert iaren tot Noe toe, die bi beuele gods die arcke maecte teghen die toecomende diluuie, ende hi hadde .iij. sonen, te weten, Sem, Cham ende Japhet doe hi vijf hondert iaer out was. Ende Noe bi beuele gods met sijnen wiue ende met sinen drie sonen, met haren drie wiuen ghingen te samen inder arcken, daer Noe hondert iaren ouer ghetimmert hadde, also dat int beghin der Bybelen al verclaert wert. Ende want alle dye werelt inder diluuien verdranc wt ghenomen dese acht personen. So sijn van desen drie sonen ghecomen alle menschen die oyt sint inder werelt geweest sijn. Nae der diluuien so plantede Noe eenen wijngaert, ende so gheschiede den goeden vader Noe die dronckenscap vanden wine eer hi de crachte des wijns kende, so dat hi ontdect lach neder ter aerden. Ende Cam sijn sone en wilde hem niet decken, maer hi bespottede sinen vader. Mer Sem en Japhet waren bescaemt, ende niet willen siende die scamelhey haers vaders, so keerden si hem metten rugge tot haren vadere wert ende decten hem sijn scamelheyt Welcke dingen Noe daer na vernemende so ghebenedide hi Sem ende Japhet, maer Caym vermaledide hi.

[fol. 43v]

Van dese drie sonen so werden bi Noes tiden gheboren ende leefden .xxiiij.M. ende hondert mannen, sonder die vrouwen ende die kinderen, dier veel meer waren, want Noe was out als hi sterff negen hondert ende vijftich iaren

Ende dit volck hadden die princen bouen hem, te weten, Nemroth van Cams gheslachte. Jetran van Sems gheslachte, ende Suffene van Japhets gheslachte

Overmits dese drie sonen van Noe is de werelt gedeylt in drie delen, te weten Asia Affrika Europa. Asia bewoonden die gheen die van Sem quamen. Affrika wert bewoont vanden genen die van Caym quamen. Ende Europa wert bewoont van dye quamen van Japhet. Van Sem is comen tvolc van Israhel ende onsen here Jhesus cristus, also die Bibel bewijst. Van Caim sijn comen veele quade tyrannen ende quade generacien. Ende Japhet had een vrouwe die heet Stuna, ende hi had .vij sonen te weten Mosoch Tyras, daer af sijn comen die van Tracien. Gomer dair af sijn comen die van Galacien, ende daer na die Gallen, dat sijn die Fransoisen. Lauan, daer af so sijn comen die Griecken. Magoch, dair af sijn gecomen die Siten. Madan, daer af sijn comen die Meden. Tubal, daer aff sijn comen die van Spaengien

Van Japhet leestmen ooc dat comen sijn .xv. generacien die Europa besaten, daer af dat die voorseide Suffene te sinen deele nam Creten ende Jtalien. Van desen Japhet sijn comen die heren van Troyen, van Rome, van Jtalien, van Vrancrijke ende van desen nederlanden ende al meest die kersten. Dese Suffene na somige boecken is af ghedaelt van Gomer Japhets sone. Ende si beginnen van hem die afcoemste van Hector van Troyen. Somige ander beghinnen Hectors afcoemste van Lauan iaphets sone, die had enen sone die Jouius heet Niet te min beyde dese generatien of linien vergaderen ten eynde ghelijc op Tros die na sijnen name maectede dye stadt van Troyen. Ende Tros had een sone die heet Jlus, die binnen troyen dede maken een borch oft palleys, ende noemdet ylion. Jlus wan een sone die heet Laomedon Bi tiden van desen Laomedon wert Troyen eer gedestrueert van Jason ende Hercules, die in Colcos trocken om tgulden vlyes. Laomedon was de derde coninc van Troyen, ende hi ende sijn wijf werden binnen Troyen verslagen. Ende hi liet na hem een sone geheten Priamus, die was gheuloden in Frigia. Ende als hi vernomen had dat vader ende moeder doot waren, so quam hi weder tot Troyen ende ontboot al die werclieden die hi conde crigen ende dede die stadt van Troyen veel schoonder maken ende meerder dan si te voren geweest hadde. Ende in dees Priamus tiden wert Troyen weder gedestrueert vanden Griecken, die daer .x. iaer voor lagen Ende dat was .xi.C. ende omtrent .lxix. iaren voor Cristus geboorte. Dese Priamus coninc van Troyen die hadde te wiue Hecube, aen hair so wan hi vijf sonen ende twee dochteren Die outste sone heet Hector die eerste vanden .ix. besten Die ander heet Paris De derde heet Diephebus De vierde Helenus Die vijfste Troylus. Die outste dochter heet Cassandra, de ander

[fol. 44r]

Polixena Ende Hector priamus outste soone hadt te wijue Andromache, daer hi schoon kinderen af hadde. Die outste sone heet Francion

Voort suldi weten dat niet seer auctentijck en is tgeen dat hier na volget totten eynde vanden tweeden capittel daer gheseyt wert van Pompeius die tegen Julius cesar quam te stride, nochtans vintment in sommige historien

Die voorseyde Francion vloot nae die destructie van Troyen met Turcus die Troylus sone was, met Antenor Eneas ende cleyn Pryamus, ende met meer baroenen ende menichten van volck ende was dolende ouer de zee ende ouer de beemden van Meotides, ende van daer quamen si int lant van Jsaurien Ende Turcus track in een lant dat na hem heet Turkien, makende daer steden ende sloten. Van hem is afgedaelt die grote Turck die hem noch scrijft Vindicator troyanorum, dat is wreker der troyanen. Antenor track in Jtalien daer hi Padua ende Venegien stichte. Eneas trac in Jtalien ende cartagen. Van hem quamen die coningen van Albanien ende die edelheyt van italien Francion hectors sone hadt een sone die hector heet Hector had een sone die Troylus heet Troylus had .ij. sonen, de een heet Francion, dander priamus, met francion bleef here in Jsauria, ende priamus trac in pannonien, dats hongarien, ende so nam hi eens princen dochter van dien lande, die daer mede te huwelick gaf al tlant dat ouer de Denouwe lach. Dese priamus was die seste vanden groten Priamus Hectors vader ende hi stichte in dat lant en grote stadt die hi noomde Sicambrien. Ende twas C.xviij. iaren na die destructie van troyen, ende sijn volc wert al na dese stadt genaemt Sicambrinen Ende dese Priamus hadde twee sonen, die outste heet Eneas, die ander Priamus, mer Eneas bleef in Sycambrien Dese Eneas hadt een soone die heet ooc Priamus Ende dese Priamus had een sone die heet siluius Brabon. Ende Siluius Brabon had ses sonen die hi al niet ghegoeden en conste. Die outste heet Wandalus, vanhem quamen die Wandelen, die ander Poluxus, na hem heet dat lant van polen Die derde heet Rusus, na hem heet dat lant van Russen Die vierde heet Hunus, ende van hem quamen die Hunen. Die vijfste heete Frixus na hem heet Frigia Die .vi. heet Siluius brabon, ende wert also geheten om dat die latijnsche heren die gheboren wt Troyen waren also [ghenaemt waren], ende die bleef here van Sicambrien, ende hi hadt sonen ende dochteren Ende sijn outste sone heet Hector, ende die bleef here in Sicambrien Ende dese hector had een sone die heet Francion oft Francke. Ende Francion had een sone die heet Francio Brabon Francio brabon hadt een sone die heet Troylus ende een dochter die heet Ylia daer Mars aen wan Romulus ende Remus Ende inden tiden van dien Troylus so wert die gote stadt van rome gemaect van sijnre voorseyder suster kinderen Romulus ende Remus, daer sijn die Romeynen af comen. Ende Troylus had een sone die Brabon heet. Brabon had een sone die Siluius brabon heet. Siluius brabon hadt een sone die hector brabon heet. Hector brabon had .ij. sonen, deen sone hete Demophon ende die wan Tarquinius Priscus ende regneerde coninc te Rome. Die ander sone heet Palamides ende die bleef here in Si

[fol. 44v]

cambryen Ende palamides hadt drie sonen, die outste heet Brabon siluius, die ander heet Diephebus, ende de derde heete Pryas, mer Brabon bleef in Sicambryen Ende Pryas quam in een eylant dat heet Pontus, daer Pilatus namaels in gesonden wert Ende Dyephebus quam in Denemercken. ende Brabon Siluius die here in Sycambiren bleef had .ij. sonen, deen heet Dyomedes ende die creech dat lant in Affriken, dair hi trac wonen Dander hiet Priamus ende die bleef here in Sycambrien. Ende hi wan eenen sone die heet Philomenus, die had drie sonen, die outste heet Archadius, die ander heet Macedo ende die derde heet Priamus, ende die bleef heere in Sycambrien Ende tlant dair Archadius track wonen dat heete hi na hem Archadien Ende tlant daer Macedo track wonen dat heete hi Macedonien, ende die Macedo was vader van Philips des groten coninc Alexanders vader Ende Archadius wan eenen sone ende die was vader van Julius cesar. Ende aldus so is die edelheyt der werelt gecomen wten Troyanen

Mer priamus voorseyt die here in Sycambrien bleef had twe sonen. de outste heet Brabon ende bleef heere in Sicambrien Ooc had hi een docher die heet Polixena ende die had namaels te manne Neptabanus coninck van Egipten den toouenaer, diemen seyt dat Alexanders moeder bedrooch bi nigromancien. Dese Brabon heer in sicambrien hadde .ij. sonen. die een heet Laomedon Ende laomedon had een sone heet pelius Ende pelius had twee sonen die beyde hieten Troylus. Deen van beyden bleef here in Hybernia, dat is Yrlant Ende dese Troylus had een soon die heet Troylus brabon Troylus brabon had eenen sone die heet Priamus. Priamus had eenen sone die hiet Francion Francion had eenen sone die heet Siluius brabon. Siluius brabon had eenen sone die heet Troylus brabon. Ende van hem quamen twee Brabonen, deen na den anderen Ende daer na quam een die hiet hector Ende van dien Hector quam noch een Brabon Ende van dien brabon quam Priamus. Van dien priamus quam Francion oft Francke Ende die Francion had xiiij. sonen, ende .v. dochteren, die hi niet al gegoeden en conste, ende daer om gaf hi sijnen sonen schat ende beual hem lyeden landt te soecken om te bewoenen also si deden. Die outste bleef heere in Sicambrien Ende daer was een vanden ghebroeders die ionckste die Brabon hiet, ende die track wonen in Griecken biden hertoge van Archadien om dat sijn vader met kinderen verladen was Ende Brabons broeder ooc een van Francions kinderen die Karel hiet die quam wonen tot Heyden tongheren in dit nederlant, ende hi wert heere van desen nederlande tusschen den Rijn ende die Schelt. Ende hi dede een casteel maken op een riuiere genaemt die Wale die bouen den Rijn leyt. Ende dat casteel heet Meghem, maer nv heetet Nieumeghem. Ende dat waer om sal namaels verclaert worden.