Van Brabant die excellente cronike

Dat .xiiij. capitel. Van die heylighe maghet sinte Amelberge, die welck Karel die grote gheerne tot eenen wijue ghehadt hadde.

JNden tiden vanden mogenden coninc Pippijn so leefde die heylige maghet sinte Amelberge die van coninclijcken geslachte was ende si bestont ooc sinte Gheertruyt in maechschapen ende sinte Aldegonden ende sinte Woutruden. Van ioncx op so began die heylighe maghet sinte Amelberghe gode te dienen als gods bruyt wtuercoren Ende alsoe aen haer ouders huys soe stont enen schonen genuechliken boomgaert daer fonteynen, bomen groeyen rosen ende lelien in stonden. So plach Amelberghe met ionge maechdekens haers ghelike daer in spaceren te gaen ende gode telouen Ende een bede huseken hadde si daer in ghemaect met een outaer daer si gode op offerde alrehande vruchten. So quam die heylighe bisschop sinte Willebert op een tijt tot haer ouders huys, ende bi rade van hem so wert Amelberge gheschict te woonen bi sinte Landrada des voorscreuen Pippijns sustere, die (also voorseyt is in haer legende) te Belsen een clooster ghesticht hadde Als Amelberge dair quam soe wertse minlijc ontfanghen bi d'ander maechden, ende buten ghecleet sijnde met siden clederen soe had se op haer teder lichaem een haren cleet daerse hem al af verwonderden. Mer het is een ghemeen seggen van oude tide, dattet gheerne vroech crommet int wassen dat een goet haeck werden sal So geuielt met dit heylich maechdekijn sinte Amelberge. want in haerder ioncheyt steldese hair tot penitencien ende castijnghe des lichaems, op dat si in harer outheyt daer in te volstandigher ende bat daer in blijuen soude

Seer vierich was si in haren gebeden ende contemplatien, ale ydelheit deser werelt schuwende.

Daer na gebuerde dat coninc Pippijn als hi iaghede op een tijt quam tot sijnder suster sinte Landraden. Ende so wert hi aensiende die schoone maghet Amelberge, ende ouer maeltijt sijnde vraechde hi, wiens dochter si was Ende als hi hoorde van wat geslachte si was, so woude hise Kaerlen sinen sone te huwelic voeghen. Mer als Amelberghe dat verstont so sprack si totten coninc aldus. Ick beminne Christum daer ick mede verbonden ben, hoe sal ic dan mit uwen sone brulocht aen gaen daer ic des hemelschen conincx sone aen hange, dien ick mijn maechdelike reynicheyt ghelooft hebbe Doe die coninck dat hoorde so seide hi O salige maget wt wiens borst so luyden die woorden des heilichs geests So loofde daer af die coninc gode, ende zijnre suster Landraden beval hi gods bruyt Amelberge. Als de coninc in sijn pallays quam so vertelde hi sijnder coninginnen Bertrada van Amelbergen deucht. Doe seyde die coninginne dat die Ridder Rodinus Amelbergen broeder ooc van sijnre ioncheyt in duechden opgewassen was, want al had hi in des conincx hof groot bewint nochtans diende hi gode deuotelic

[fol. 17r]

Daer na versocht ende badt de grote Karel sinen vader coninc Pippijn om amelbergen te hebben teenen wiue, want si hem bouen alle ander behaechde Mer al seyde hem sijn vader dat hi die maget daer mede niet en quelde oft en bedroefde, nochtans en conste hy sijn herte daer af niet keeren Ende want onse here sijn bruyt bewaren wilde, so openbaerde sinte Gheertruyt inden slape Rodinus sinte Amelbergen broeder hem vermanende aldus. Stant op ende neemt v suster ende vliet met hair want die coninc heeft boden wt ghesonden om haer te crijgen op dat hise te wijf troude. Rodinus ontspranck ende hi haeldese ende brachtse te Vyluorden heymelijcken daer die heylige maghet in vasten, in waken ende in gebeden gode ynnichlic diende Haer spise was broot met groenen cruyde

Op een tijt seide sinte Amelberghe tot haer dienstmaget datse een weynich kersen haelde opten cant van der zennen. Ende als sijt haer pijnde te doen ende neychde opten cant vanden watere so quam daer enen groten vissche na haer gesprongen so datse seer veruaert was ende riep om hulp Mer die heilige maget bekende die gaue gods ende seide tot haer dienstmaget Gaet weder tot den vissche ende aenueert hem met der caken ende trecten opt droghe, twelck si dede. Doen dancte sinte Amelberge gode, ende spijsde daer af die arme ende ooc haer familie

Daer na vertrack sinte Amelberghe op een ander plecke in Brabant die hair toe behoorde ende stichte daer een kerck om die eer van sinte Martijn. Ende noch op een ander plecke haer toe behorende op die Scelde gelegen geheten Temsick so timmerde si een kerck ter eeren van onser lieuer vrouwen Maria, daer si voort bleef wonende ende een heylich leuen leydende tot dat si wert afliuich, in vastenen, abstinencien, in gebeden, ende in miltheden totten armen ende in allen duechden volherdende meer dan men soude connen wtspreken

Bekennende daer na sinte Amelberge dat haer sterf dach was nakende So had si altijt haer oogen ende handen ten hemel waert, gode aenroepende, ende met groter begeerte begeerde si tot haren bruydegom te reysen Ende na dat si haer sacramenten ontfangen hadde so verschietse vander werlt ende die enghelen ontfingen hair siele Jnt iaer ons heren .vij.C. ende .lxij. opten .x. dach van Julio, ende si wert tot Temsic begrauen in onser vrouwen kerck, die si ghesticht hadde. Mer daer na gheschiede haer translacie ende wert verdragen totter abdyen van sinte Peeters te Ghendt der ordenen van sinte Benedictus.