Van Brabant die excellente cronike

Dat .xv. capitel. Van sinte Alaert abt ende confessoor.

[fol. 17v]

SJnte Alaert was des groten coninc Karels broeders sone want coninc Pippijn sijn vader had een sone de hete Bernaert sint Alaerts vader, die welck sinte Alaert in sijn iuecht sijnde so conuerseerde hi int pallays van coninc Kaerle onder de meeste, nochtans so vreesde hi gode ende bewaerde sijn herte reyn sonder hem te laten verleyden ouer mits vrese oft minne van yemande

Als hi .xx. iaer out was so begaf hy hem in die abdye van Corbie in vrancrijke der ordenen van sinte Benedictus daer hi die andere in ootmoedicheden ende wercken der goedertierenheit te bouen ghinc. Ende also leefde hi dat hi metter herten meer scheen te sijn inden hemel dan inder eerden bi rade van eenige die sijn wedercoemse totter werlt begeerden. So wert hem den last ghegeuen den hof te oeffenen ende te bewaren, op dat hi by verdriet des arbeyts weder keerde tot des conincx pallayse, mer ghehoorsaemlijc ende ongeueysdelic nam hi den last des hoofs, dien hi neerstelic oefende ende met Maria magdale na sochte hi daer in Jesum Christum.

Daer nae want sijn vrienden ende magen hem te dicwils visiteerden, twelc hem vernoeyde als een letsel sijnre salicheyt so ghinc hi wonen bouen Rome te montcassijn Mer een cleyne tijt so bleef hi dair wonende, want coninc karel sandt bodem om hem, dien weder brachten tot Corbye tegen sijnen wille Als hi daer wedercomen was so gheuoelde die abt dat hi cortelic steruen soude Ende bi gemeynen consente der broederen maecte hi Alaerde abt ende die coninc stelden in possessien Ende van doe voort aen so vaste ende bede hi meer dan te voren ende seer ontfermhertic was hi den armen.

Op een tijt als sinte Alaert den armen alle die spise had gegeuen so verweet hem dat de kelder waerder, mer Alaert antwoorde hem met sachtmoediger herten seggende En weest niet verstoort want die here sal ons oueruloedelic geuen. Doe sachmen voor die porte twe wagenen staen geladen, deen was geladen met case, dander met vissche ende so bekende die kelderwerder zijn sculde ende badt sijnen abt ootmoedelic dat hi gaue al dat hi wilde.

Jtem soe vol godlicker minnen was hi dat hi bi na altijt weende, smeltende in tranen. Ende hi was een kint des vreden, want tusschen dye van Beneuenten in Jtalien ende die van Spoleten was grote oorloge, ende sinte Alaert reysde daer ende arbeyde so lange om den pays te maken, niet af latende tot dat hijse met payse vereenichde.

Daer nae keerde hi weder tot Corbie

[fol. 18r]

ende coninc Karel sterf tot Aken achterlatende Lodewijc den goedertieren sinen sone die na hem keyser ende coninc wert. Die welcke Lodewijc al was hi goet nochtans bi quaden rade van enigen sijnen dienaers die sinte Alaerts wercken benijden ende int quaetste trocken, so wert sinte Alaert met sinen medebroederen wten lande ghebannen, daer in hi seer verduldich was gode danckende dat hi om der duecht wille lijden mocht ende hi trooste sijn broeders So wert die heylige man gestelt in een eylant in Aquitanien, dats in Gascoingien, daer hi vij. iaren in een clooster woonde, meer leuende een engels leuen dan een menschelijc leuen, ende was een spieghel alre duechden. Die abt des cloosters eerde hem als sinen vadere ende en wilde sonder Alaerts raet niet ghedaen hebben

Na die .vij. iaren bider godlicker inspiratien wert die keyser ende coninc lodewijc ghesint den heyligen man weder te roepen. Daer alle tlant groote blijtscap af maecte, clercken monicken ende tgemeyn volck. Als hi dan tot des conincx pallays quam so ontfinc hem de coninc eerlic ende badt hem ootmoedelic genade ende sinte Alaert vergaft hem. Ende so keerde hi met eeren na Corbie ende wert van sijnen broederen deuotelic ontfangen.

Dair na wert hi weder tot des conincs palayse geroepen, die openbaer penitencie dede van dat hi in sinte Alaerdt gesondicht hadde, ende hi beual sinte Alaerde ghemeyn goet ende regiment te reformeren. Andere menschen tracteerde hi suetelic, mer hem seluen castide hi seer scarpelick

Daer nae fondeerde hi een clooster in Sassen van sinte Benedictus orden Ende op een tijt als hy wt sassen weder quam so wert hi den cortse crigende seer hertelic nochtans bleef hi ghestadich in sijnen ghebede. Ende vanden bisscop van Beauays die sijn monic gheweest hadde ontfinck hi dat heylich olysel. Ende ligghende in groter crancheyt so openbaerde hem onse here Jesus Ende op den dach der besnidenissen ons heren riep hi sijn broederen tot hem voorseggende dat hi steruen soude op den seluen dach Ende so ontfinc hi theylich sacrament ende hi verschiet inden here die gebenedijt is inder eeuwicheit. So werdt sinte Alaerts dach ghehouden des anderen dages na Jaers dach.