Van Brabant die excellente cronike

Dat .xij. capitel. Van sinte Arnout marcgraue des heilich rijcx ende namaels bisschop van Mets Ende van sinte Wandregisilius sinen neue.

SInte Arnout is ghedaelt vanden geslachte van coninc Clodoueus

[fol. 14r]

van vrancrijcke Want Bliteldis coninc Dagobertus suster was sint Arnouts oudemoeder. ende sijn vader heet ooc Arnout ende sijn moeder sinte Oede als corst hier voor geseit is Sint Arnout troude sinte Doda, ende van haer hadt hi drie kinderen Te weten Clodulphus die sinen vader in heylicheden na volchde ende wert na hem bisscop van Mets Ende sinte Doda de moeder begaf hair te Trier in een beslote stede gode dienende

Die tweede sone Walciscus vader van sinte Wandregisilius, die welcke wandregisilius eerst coninc Dagobertus van vrancrike diende dien seer verhief Ende bi sijnre ouders rade troude hi een edel maget, mer hi onderweesse also datse beide reyn bleuen bi gemeenen consente Ende sinte wandregisilius die ghinc in een clooster dat hi selue stichte dair hi in alte grote heilicheit ende abstinentien leefde. Hi en adt in lange tijt niet dan tweewerf ter weken, des sondachs ende des donredachs. Daer na wt groter deuocien gaf hi hem tot heremiten leuen te Fontenelle daer hi een clooster stichte, dair hi tot .xc. iaren out sijnde die iongers in arbeyde ginck te bouen. Daer nae wert hi sieck ende .iij. dagen ende drie nachten lach hi tot gode opgetogen ende thoonde die dore der hemelen hem gheopent Doe verschiet hi hem tekenende metten teeken des cruyces. Ende doe hoorde een sijn discipel alte sueten hemelschen sanck Sijn heilich lichame rust te Ghendt

Die derde sone van sinte Arnout hete Angisus oft Angijs dien sijn vader gebenedide ende zijn geslachte propheterende datse souden werden erfconingen van vrancrike ende ooc roomsche keyseren alst nae bleeck. Dese Anghijs troude sinte Beggen hertoghe Pippijns van Landen dochter, also dat in tweeste dele deser croniken veruolcht sal werden

Jc keer weder op sint Arnout die achter liet al die eere der werelt ende ghinc ter woestinen om heremijt te werden So gebuerdet dat hi comende op der bruggen vander Moeselen daer dat water seer diep was, so nam hi sijnen rinck ende werpen int water seggende Als ick desen rinck weder crige so sal ic sonder twifel betrouwen dat ic vry van sonden ben Doe ginck hi inderwoestijnen daer hi langhe tijt der werelt steruende gode leefde.

Daer nae als die bisscop van Mets gestoruen was so wert sinte Arnout daer bisscop ghecoren Ende daer bisscop sijnde ende vleesch deruende so wert hem een visch gebracht die sijn cock op doende eenen rinck daer in vant, dien hi sinen here blidelike gaf Ende sinte Arnout kenden ter stont, ende het is .ij. dach reysen van daer totter bruggen daer den rinck eerst geworpen was, ende hier af dancte sinte Arnout onsen here gode almachtich Ende van dier tijt voort soe en was hi niet slapper in sijn leuen mer noch veel neerstiger dan hi was te voren in vasten, waken ende bidden.

Ende so milde van aelmissen was hi te geuen so dat grote scaren van armen volke wt vreemde landen tot hem quamen om aelmissen te ontfangen. Altoos so was hi sorchfuldich in goeden wercken Ende sonderlinge om religiose personen ende pelgrims te herbergen, die hi selue

[fol. 14v]

haer voeten wiesch ende reinichde met sinen handen, die hi ooc spijsde ende cleede. Ende dicwil als hi drie daghen ende ooc somwilen meer gheuast hadde so leefde hi somwijlen met gersten brode ende water, ende een haren cleet droech hi op sijn naecte lijf.

Noch een mirakel van sinte Arnout dat hi dede in sijn leuen.

ALs coninc Dagobertus regneerde ende in sijn pallays sijnde met sinte Arnout sprekende, so quam daer een malaetsch man roepende ende biddende aelmisse van sinte Arnout. Doe beual hy datmen den armen man in huys leiden soude Ende doe ghinc hi tot hem ondersoekende of hi ghedoopt waer Doe antwoorde die arme lazersche man dat hi niet gedoopt en was want om sijnder groter zeericheit ende verworpenheit wille en meende hi niet dat hem yemant daer toe veroetmoedigen ende dye gracie doen soude. Doe doopten goedertierlijcken die heylige man sinte Arnout, ende terstont was hi ghenesen van alder lazarien der sielen ende des lichaems. Van welcker miraculen wille die coninc ende al dat volck hem seer verwonderden, gode daer af louende ende danckende

Na veele teekenen ende miraculen die bi sinte Arnout geschieden in den volcke al om daer ontrent geseten, so dachte hi weder te keeren totter woestinen Maer want hi sijn schaepkens niet en dorste laten onbesorcht, so wert bi consente des conincx Lotharis de derde in sijn stede bisscop ghemaect sinte Goricus Ende so achterliet weder sinte Arnout alle wereltlike dingen, ende ghinc anderwerf ter woestinen waert ende timmerde daer cleen cellekens daer hi gode loofde gestadelijc nacht ende dach Ende lazersche ende ander arme ontfinc hi daer ende diende hem met sijnen handen, haer schoenen wtdoende ende vaghende, haer voeten ende hoofden wasschende ende haer bedden makende, ende hair noottrufte gaf hi hem Ende in desen ende anderen heylige wercken volherdende so sterf sinte Arnout salichliken in onsen here Ende steruende badt hi dengenen die voor hem waren datse baden voor hem den here die hem ordelen soude want hi belijde dat hi geen goet gedaen en had, maer dat hi vol sonden was.

Ende naedat hi acht iaren ouerleden was so dachte sinte Goricus die bisscop sinte Arnouts lichaem te verheffen Ende met twe andere bisscopen, te weten van Toul ende van Verduyn ende mit grote scharen van clercke ende van volcke so gingen si ter woestinen daer si sint Arnouts lichaem met groter reuerencien ende deuocien vonden ende nament weerdichliken ende brachtent inder stadt van Mets. Ende onderwegen sijnde ende ghebreck van drancke lijdende bi auont, so wasser een man dye hadt luttel biers in een clein vaetken ende seggende met goeden betrouwen. nv wil ons sinte Aernout voeden desen nacht Want tgene dat ons ghebreect dat moghen wi mits sijnre hulpen van gode vercrigen. Ende ter stont so vermenichfuldichde dat bier also datse alle ghenoech hadden ende des morgens ghenoech ouer bleef Daer na quamen si met groter blijschappen in de stadt. Ende ter stont quam alle

[fol. 15r]

die stat met crucen ende vanen in schoonre processien hem te ghemoete Ende haren herder dien si verloren hadden ontfingen si doe regnerende inden hemel, ende sijn heylich lichaem droeghen si in dye kercke vanden apostolen. Ende daer na so dede sinte Arnout grote wonderlike teekenen van blinden, van croepelen ende ander crancke die gesont werden. etcetera. Ende sinte Arnouts-dach comt opten xvi. dach van Oogst