Van Brabant die excellente cronike

[fol. 13r]

Dat .xi. capitel. van sinte Oede weduwe

SJnte Oede was gheboren vanden gheslachte vermogender coningen van Vrancrijcke ende hadde te manne eenen prince geheten Arnout, dair moeder af was sinte Bliteldis sustere van Dagobertus coninc van Vrancrijcke Dese vrou had een machtigen prince te manne geheten Anselbertus seer heylich ende deuoot van leuen so dat hi verheuen is, hi was marcgraue des heylich rijcx Dese voorscreuen Arnout die was ooc marcgraue des heilich rijcx twelc men heet tlant van Rijen. Hi hadt van sinte Oede eenen sone sinte Arnout. Als sinte Oeden man salichlic gestoruen was so bleef si weduwe gode dienende Ende na dat exempel vanden heylighen ouders onser lieuer vrouwen Joachim ende Anna so deylde si al haer tijtlic goet in drie deelen Dat een deel gaf si den kercken ende religiosen Dander deel gaf si den siecken ende den arme menschen Ende dat derden deel behielt si tot haren ghebruycken Ende haer lant regeerde si nochtan wijslick door ghetrouwe mannen. Seer ootmoedich ende ontfermhertich was si want den armen naeyde si selue haer clederen ende si hief selue der armer kinder wter vonten. Ende totter armer huysen ghinc si om die te troosten al woonde si ooc verre ende al was de wech slijckachtich Bi dese ende dier ghelijcken wercken was si gemint van haren huysghesinne ende van allen menschen.

Sinte Oede dede ooc maken een hospitael bi haren huyse daerse die arme en[de] siecke met groter liefden tracteerde ende visiteerde tweewerf des dages ende met alder ootmoedicheyt gafse hem blideliken haer noottruft

Ende als Arnulphus hair sone (dats sinte Arnout) tot manliker ouderen gecomen was so gaf hem sijn moeder sinte Oede tlant ouer bi rade vanden eedelen. Dese sinte Arnout had een soone die Angijs heet die troude sinte Beggen sinte Geertruyden suster Ende sinte Arnout wert bisscop van Mets. welke materie hier nae int tweede boeck langer bescreuen wert.

Item sinte Oede was ooc moeye van sinte Hubrecht bisscop van Ludic Ende als si op een tijt alle haer spijse den armen gegeuen hadde so quam onse heere Jhesus tot haer in gedaente van eenen armen ionghelinc biddende om herberge om den name christi Ende als si den sueten name christi hoorde soe ontfinc si hem blidelic Die iongelinc sadt bi ende badt haer datse op stonde ende haelde hem wat te eeten Sinte Oede stont op ende

[fol. 13v]

ginc totten korue die si verstaen hadde datse ydel was ende si vantten vol brooden ende ander nootruften. Die iongelinc ontfinc die spijse wt haer hant ende met soeten woorden sprac hi haer aldus toe. Op ander tijden hebdi my ghewone geweest mi te ontfangen in minen leden met huden hebdi mi ontfanghen in my seluen Weet dat v veel vruechden bereyt werden, ende die v bidden sullen hulpe dees teghenwoordigen leuens bider gracien dijns verlossers ontfangen, ende also verschiet hi.

Daer na wert sinte Oede sieck ende si bekende den dach haers verscheydens te nakene Ende alle aertsche sorghe stelde si wt harer herten om vrylic te mogen haren scepper aenroepen Vrolic was si in haer crancheyt ende verbeide den dach hairs verscheydens om te comen van droefheden tot blijtscapen, van duysterheden totten lichte ende vander doot totten leuen. Ende ghebiecht sijnde ontfinc si dat lichaem ons heeren ende haer heylich olysel biddende om hulpe vander menschen ghebede. Ende doe begeerde si alle haer haue om gode ghegeuen te werden den armen, wtghenomen een rocxken dairse in begheerde begrauen te werden Ende haer ghebet gedaen hebbende so lach si blidelic hare oogen ten hemele stierende ende sach onsen here Jhesum cristum int midden der engelen hair soetelic roepende totter eeuwiger rusten. Doe beualse die ontrent haer stonden te gode ende si verschiet opten .xxiij. dach vander maent October. Hair dode lichaem roeck doe als balsem. Ende die priesters droegent tot sinte Joris kercke diese seluer ghemaect hadde van haren goede.

Daer na glorificeerde god sijn ghetrouwe dienaerssen oock inder aerden tot sijnre eeren. Want die siecke werden gesont op hair graf, so dat die eerweerdige Floribertus bisscop van Ludick daer quam met groter scharen van geestelike ende weerliken volcke openende haer graf Daer vantmen haer heylich lichaem wtgheuende soeten roke, ende haer reliquyen werden verheuen ende sijn gheeert in veel plaetsen Die welcke translatie geschiede opten .xiij. dach der maent Julij ter eeren ons heren Jhesu Christi.