Van Brabant die excellente cronike

Dat .iij. capitel. Van die heylige maget sinte Gheertruyt

ALs sinte Gheertruydt noch was een clein kint so werde si van hair eerwerdige moeder sinte Itten gestadelic geleert inder wet goods, ende si was groeyende in wijsheden bouen alle ander haers gelijcx van ouderen, van gode ende den menschen bemint Op eender tijt als die eerwerdige coninc Dagobertus coninc van Vrancrijck van haren deuoten vader hertoge Pippijn was gebeden ter maeltijt, so was daer mede een ionghelinc des hertogen sone van Oostrike die vanden coninc ende sinte Gertruyden ouders dit heilich maechdeken tot huwelic begerende was. Haer vader wilde eerst ondersoecken den wille zijnre dochter ende hi dedese roepen Ende als haer geuraecht wert oft haren sinne was om te manne te hebben den voorscreuen eedelen ende rijcken iongelinc met siden gecleet blinckende van goude ende van gesteente Doe antwoorde si aldus Ic en begheer niet desen noch enigen anderen sterfliken brudegom. Van welck antwoorde die coninc ende ander daer etende seer verwondert waren, ende die iongelinc ghinc bescaemt wech

Na .xiiij. iaren als die eerweerdige Pippijn haer vader afliuich geworden was so bleef dit heilich kint bi sijnder moeder Jtten hair ghehoorsaem sijnde ende haer deuchden nauolghende. Als Gheertrudis aldus voortgaende in allen duechden was, so offerdese haer moeder den heyligen priesteren om tontfaen dat heylige wijl, ende si wert geestelicke moeder ende abdisse des cloosters ende der deuoter maechden van Nyvele. Want in haer was alre goeder zeden tamelicheit, so soberheit, miltheit in almissen ende in woorden menierlicheyt ende heimelic droechse haren clederen Altijt studeerde si goet exempel te geuen haren ondersaten in oetmoedicheden ende goedertierenheden, te hulpe comende den weduwen, wesen, ende ellendige personen. Ende so becommerdese haer met heylige lessen, datse bi na al den bibel houdende was in hair memorie, ende bi ingeuen des heiligen geests so conde si die doncker godlike scriften ende godlike misterien verclaren. Nae een tijt van iaren als sinte Gheertruyt haer met veele

[fol. 8r]

abstinencien ende waken vermoeyet had so wert si van binnen bekennende dat den tijt haers af scheydens van deser werlt nakende was, so leyde si neder die sorge ende laste des regiments met rade harer ondersaten Ende den tijt die haer ouer blijuende was, te weten drie maenden lanck die ouerbracht si in gestadigen heyligen aendachten ende in oeffeninge van heyligen scriften. Ende also verwachten si de wterste vre als reysende van duyster totten lichte van armoede tot rijcdomme ende vander doot totten leuen Ende als de doot haer bi was so beual si eenen van haren geesteliken broederen dat hi haestelic soude gaen tot eenen heyligen man geheten Vlcanus wonende int clooster van Fossij, ende dat hi hem vraghen soude, in wat dage datse van deser werelt scheiden soude, want si seer vreesde ende ooc verblide. Als dese bode totten heiligen man quam sijn bootscap doende so antwoorde Vlcanus aldus Morgen binnen den dienst vander missen so sal de maget cristi Geertruyt wten lichame scheyden Ende segt haer datse niet ontsie die doot mer datse blide si, want die heylige bisscop Patricius metten engelen gods ende met groter glorien sijn bereet haer te ontfangen. Als gheertrudis dese antwoorde verstaen hadt so toonde si alte bliden aenschijn gode danckende dat hijse bi sijnen dienaren aldus ghewerdichde te vertroosten Ende so ouerbracht si al dien nacht met haren mede gesusteren wakende met psalmen ende heylige oratien

Des ander daghes op een sondach den .xvij dach van Meerte ontfaende dat werdige lichaem ons liefs heeren so verschiet si binnen der missen, also Vlcanus voorseyt hadt, te weten in haer .xxxiij iaer gode louende ende danckende

Op desen seluen dach so openbaerde haer sinte geertruyt na haer verscheyden eender abdisse te Trier gheheten Modesta die was hair grote vriendinne, ende si sach sinte Geertruyt bi haer staen na datse haer gebet voor onser vrouwen outaer gesproken hadde tot haer seggende aldus Suster modesta weet sekerlic dat ic huden tot deser vre wten lichaem verscheyden ben, ende so verschietse van daer. Ende dat beuant Modesta warachtich

Hoe sinte Gheertruyt gesien was na xx. iaren bouen de reefter hairs cloosters staende ende den brant des cloosters blusschende Ende hoe si een doot kint verwecte, twelck aen haer bedde geleyt was Ende desgelijcx van alderhande siecken ende crancken menschen ende van gheuangene ende die sijn in node, hoe si van haer plagen vertroost ende verlost werden dat machmen lesen int boeck van haren miraculen ende exempelen Ende het wert hier achter gelaten om der cortheyt wille.