Van Brabant die excellente cronike

Dat .iiij. capitel. Van sinte Amelbergen des hertogen Pippijns suster dochter die vijf heylighe kindren hadde. Ende eerst sal hier int corte verclaert werden die historie van sinte Reynelt haer dochter

[fol. 8v]

DIe voorseyde sinte Pippijn sinte Geertruyden vader hadt een suster gheheeten Amelberge Ende die had een dochter geheten sinte amelberge die seer schoon was, vol eerbarheden ende heylich van leuen Ende die had eenen eedelen man genaemt wytgherus, die in dier tijt groot was in des conincx hof van vrancrijc. Ende van hem creech si vijf heilige kinder, te weten sinte Emebertus bisscop van Camerijc, wiens leuen, miraculen, ende heilige wercken die kercke van Camerijc vercierende is, sinte Goedelen, sinte Reynelt, sinte Pharelt ende Venancius die alle van harer iuecht in reynicheden op gheuoet werden. Ende al waren daer veel grote eedel heeren sinte Goedelen ende sinte Reynelden te huwelijc versoeckende om haer edelheyt ende rijcdommen wille, soe wilden si nochtans in maechdelijcken state bliuen ende den hemelschen brudegom met alder herten aen hangen Ende als beyde haer vader ende moeder sagen datse in dien opsette volherdende waren, versiende beyde haer dochteren van tijtliken goede, so wilden si ooc de werelt laten wt minne des hemelschen rijcx. want die deuote prince wytgheer haer vader ontfinc dat habijt van religien ende begaf hem in een cloostere Ende sijn huysvrouwe Amelberge ontfinc dat wijl van sinte Aubert bisscop van Camerijc, ende wert van hem gode gesacreert, latende hair schoen goet dat groot was om gods wille ende gauent haren dochteren Reynelt ende Goedelen. Sinte Reynelt die was voortgaende in allen duechden ende godlike wercken, vastende ende bedende Haer tonge en sweech nemmer meer van gode te louen. Ende also veel aelmissen gaf si den armen datse niet en behielt dan nauwelic cost ende behoeflicheyt Onder haer cleder droechse een haren cleet, ende haren dienstboden dede si meerder dienst dan si haer deden. Altijt ginc si met bloten voeten, ende nacht ende dach was si dicwil eenpaerlic biddende. Selden adt si meer dan eens des dages, ende dan namse luttel broots met water Costelicke bedden versmade si ende lach op de eerde ende in haer haren cleet Ende met groter deuocien ginc si te Jherusalem, daer veel af te scrijuen waer, dat ic late om der cortheyt wil So wilde onse here hair volstandicheit ansiende haer goede leuen met vruchtbarigen eynde vercieren, haer geuende orsake om te comen totter cronen der martelaren. want in dier tijt als god dat kersten volc om der sonden wille liet gheesselen vanden Huynen die in Gallien gecomen waren verderuende alle tlant metten swaerde ende metten viere. Ende so wert sinte Reynelt vermaent van haren vrienden dat si vlieden soude Twelc si niet en wilde doen, mer si bleef totter doot toe totter plaetzen daer si woonde te weten, tot Santen, twelc is op de frontieren van Brabant ende van Henegouwen Als dan die ongelouige daer quamen so keerde haer die heilige maget met haren geselscap tot innige gebeden, ende cruyswijs lach si voor sinte quintijns outaer Ende als die ongelouige als briesschende leeuwen inder kercken quamen so trocken ende sloegen si die heilige maget seer wredelick Ende met blijscapen haers herten sprac si tot gode aldus. Jc danck v here Jhesum christe die mi geweerdicht hebste te rekenen int getal uwer dienstdeernen ende daer om so wilt nv ontfangen mijnen gheest. Ende

[fol. 9r]

so wt recte si haren hals ende wert metten swaerde onthalst ende voer ten hemele Desgelijcx werden onthalst steruende martelaers die coster vander kercken haer dienaer ende een haer dienstwijf. Ende daer om heet die plaetse ten Santen want daer rusten .iiij. santen.