Een Aemstelredams amoureus lietboeck

Een nieu Liedeken, Op de wijse: Wilhelmus van Nassouwe.

Siet hier mijn Liefste ghepresen
In mijn jonckharte fijn
Ghy doet mijn Hart ghenesen
Als ick ghedenck om dijn
Nochtans ben ick gheuanghen
In droefheyt swaer
Om troost dats mijn verlanghen
Van v reyn Lely claer.

Laet nu doch eens wesen
In uwe sinnen reyn
Als een Fonteyn ghepresen,
Vloeyen wt liefde pleyn
In my zijt ghy verheuen,
Met groter eerwaerdicheyt
Dus laet mijn Liefde leuen,

[p. 151]

 

V zy vruechde ghespreyt.

 

 

 

Anders so moet ick sweruen,

 

Als een droeuich helt

 

Can ick gheen troost verweruen

 

So wort ick seer ghequelt

 

Die liefde in my doet branden

 

In mijnen ionghe moet

 

O troost comt my op handen

 

Van v mijn liefste soet.

 

 

 

Eewich in pijn te leuen

 

Het is een swaer verdriet

 

Dat my gheen troost wort ghegheuen

 

Die vreucht van my nu vliet

 

Den doot doet my deurkeruen

 

Met alle droefheyt swaer

 

Laet Trouw aen v verweruen

 

Reyn bloeme int openbaer.

 

 

 

Dus doet na mijns begheren,

 

Princesse liefste greyn

 

Nae v staet mijn begheren

 

Ghy zijt int harte alleyn

 

Cupido heeft mijn deurschoten

 

Met Venus stralen soet

 

Ten heeft my niet verdroten

 

Als ghy my quaemt te moet.