Een Aemstelredams amoureus lietboeck


Een nieu Liedeken, alzoot beghint. Schoon Liefken wter maten Wilt my in Liefde bystaen, Ick en sal v niet verlaten Dus troost myn o edel graen Want ghy laet mijn inden noot En om v sterue ick die doot Troost mijn o mondeken root. Mocht ick eens troost verweruen Och soete Lieueken fijn So soude mijn bitter kermen Vertroost sijn op corten termijn Want ghy zijt die liefste alleyn En op v set ick certeyn Al mijn hope in swerelts pleyn. Dus wilt mijn bitter kermen Schoon Liefken eens ghedencken claer Ontfangt my in v armen Alder liefste vrouwe lijffbaer
[pagina 152]
Want ghy laet my int verdriet En groot leyt is mijn gheschiet Maer die cause en weet ick niet. Mijn trouwe wil ick v gheuen O soete Lieueken fier En v altijt zijn beneuen Reyn bloeyende Egelentier Dus schrijf ic aen v eenen groet Bewijst mijn reyne liefde soet Alder liefste bloemken goet. Ick en ben niet als die pluymen Die met alle winden wayt, Wist ick mijns Liefs costuymen So waer mijn iongher herteken ghepayt Want qua nyders tonghen quaet Sy sayen altijt haren zaet Sy maken mijn sinnekens disperaet. Princesse Lief ghepresen Peynst om den alderliefste van dijn Mocht ick v dienaer wesen En dat ghescheyden moet sijn Scheyden ghy doet mijn pijn Vanden alderliefste mijn Adieu het moeter ghescheyden zijn.