Een Aemstelredams amoureus lietboeck

Een nieu Liedeken, Op die wijse: alzoot beghint.

Laest ontrent den auont by auontueren
Doen ginck ick dolen achter straet
Van liefden en wist ick niet the geduren
Want mijn hert was heel desperaet
Doorwont van binnen, doorwont van binnen
Tot mijnder baet, quam zy daer te maet
Die ick beminne.

Sy sprack my toe doe ick haer kende,
Ick en was mijn dagen niet meer verblijt
Ic ginck my also haestelick waerts keren,
En ick sprac haer toe met also groten vlijt
Liefste ghepresen, liefste ghepresen
Och mocht ic met iolijt op desen blijden tijt
Eens by v wesen.

Venus die ginck ons daer tsamen binden
Al daer wy stonden in minnen fier
En Cupido ginck boecken vinden
O[... schieten] met vrou Venus lier
met stralen der minnen, met stralen der minnen
Sy bracht my hier, in also swaer dangier
Die schoone Goddinne.

Na troost te vragen, stont alle mi behagen
Maer laci ten mocht mi gebeuren niet
mijn ogen op haer sagen mijn hart begint te clagen
Alderliefste waerom laet ghy my int verdriet,
Met druck beuangen, met druck beuangen
Ghy zijt mijn liefste lief toont my doch v gherief,
V dienaer wilt ontfanghen.