Een Aemstelredams amoureus lietboeck

[p. 111]

[Een nieu voorsanck: Op die wijse van die Lommerdemy.]

Liefde te draghen is een lust
Daer lief in liefd' behaghen rust.

Een nieu voorsanck: Op die wijse: van die Lommerdemy.

Laestmael al met blijden sinnen,
Quam ic al deur dat groene wout
Daer vant ic Venus die goddinne
Met haer geselschap ionck en oudt
Elck brocht daer vreuchde voort,
Want zy songhen met accoort
Compt ghesellekens vry by my
Met v liefken in dat groene
Weset vrolick ende bly,
Hier by ons in dit saeysoene
Maeckt iolijt tot deser tijt
Tot yeder spijt diet v benijt.

Venus en Diana schoone,
Waren oock in dit rozier
Cupido die sadt in den throone
Jupiter was hoochste bestier
Doe sanck daer een Basuyne claer,
Luyde dat was immer waer
Comt gesellekens vry by my met.      etc.

Doen ghinck Venus onuerholen,
Lustich ophangen enen Crans
Ghemaeckt met Rosen en Fiolen,
Daer vergaert was eenen dans
Doe sanck daer eenen voys en troys
Met een also soeten voys
Comt ghesellekens vry by my met.      etc.

Doen wy daer lustich saten en songhen
Vruechde bedreuen delicaet
Discordia quam daer in ghesprongen,
Seer verrummelt ende quaet
Maer haren raet waer niet geacht
Want wy songhen met grooter macht
Comt ghesellekens vry by my met.      etc.

Twas daer seer lustich om te blijuen
Peynse ic eedele Prince ient
Moche ick na mijns selfs gherijuen
Mijn Liefken spreken present,
Ter wijlen ick stont in dit ghepeys

[p. 112]

 

Sang Cupido noch een reys,

 

Compt ghesellekens vry by my, met.      etc.