Een Aemstelredams amoureus lietboeck

Een nieu Amoreus Liedeken, Op die wijse: alzoot beghint

In groot ongeluck ben ick gebooren
Want Fortuyn my rebelleert
Swaer ghepeyns comt my te vooren,
Waer deur mijn vreuchde declineert.

Om v absentie is mijn versuchten,
Eerbaer Maechdeken delicaet
Want ick sorghe voor quade gheduchten
Die veel gheschieden door nijt en haet

Hout v beloften gheschiet int scheyden,
Van v en my ghy weet wel waer
So sal ick hopende, den tijt verbeyden
Hoewel een uyr my druckt een iaer.

Al mocht my Cresus schat ghebeuren,
En Alexanders Rijckdom groot
Jae des Werlts vreuchde te kueren,
Sonder v Liefken waert my die doot.

Niemant en can mijn gheest vermaecken
Dan ghy o edel Vrouweken graen
Om v alleen moet ickse versaecken,
Hoe rijck hoe schoon hoe wel ghedaen.

Nacht en dach is mijn ghedencken,
Ons diuizeren sonder pijn,
Twelck nu falgeert en my gaet crencken
Dus weest ghenadich over mijn

Ewighe vruecht sal ick ghenieten
Is dat ghy mijns ghenadich zijt
Pijn noch arbeyt sal my verdrieten,
Ontfermt ghy mijnder nv eer tijt.

[p. 103]

 

Princesse.

 

 

 

So sal Princesse alle mijnen rouwe,

 

En dangier gheheel van my vlien

 

Dus blijft v dienaer in liefde ghetrouwe,

 

En laet my troost als nu gheschien.