Een Aemstelredams amoureus lietboeck

Een nieu Liedeken, Op de wijse Tant que viueray.

Ghy Venus kinderen ient,
Ghy die hier zijt omtrent.
Op noden v in onse convent,
Met v liefste Lieueken bekent.
Hout met haer perlement,
Den Mey staet net en fijn
Blijft niet absent,
Al zydy van Venus verblent
Dwelck v hert duerprent,
Troost wort v medecyn, blijft dit bekent
Ghy comt wt allen pijn
Ghy bloeyende Egelentieren
Helpt ons vruecht vereren,
Die bloemkens staen seer fray,
Lustich in haer gheray,
Alle Amoruese dieren, Wilt ons obidieren
Met v Lief in een valley
Maeckt vruecht ende gheen gheschrey.
In dese coele Mey.

Comt al ter baen,
Die met druck sijn belaen
Der vruechden traen
Leyt nu al int saysoen
Wiltse niet versmaen,
Sy sal v met vruechden voen
Elck wil zijn Lief ontfaen,

[p. 62]

 

Die nyders vlien van daen, laet v doch raen

 

Die Mey staet net en groen

 

Wiltse niet versmaen,

 

Met v liefste Lieueken zeer coen,

 

Ghy bloeyen Egelentieren. etc.

 

 

 

Ghelijck die fiere Nachtegael,

 

Laet horen uwen tael, In Venus sael

 

Laet horen ws stems gheclanck,

 

Bemurwet v hert van stael,

 

Al metter minnen dranck

 

Schoon Liefken loyael, Ghy zijt de principael

 

Waerom dat ick eens dwael,

 

Ick blijft in mijn leuen lanck

 

Ick drinck wt Venus schael,

 

Ghy hout my in bedwanck

 

Ghy bloeyen Egelentieren. etc.

 

 

 

Princelijcke graet

 

In danck doch dit ontfaet, Vroech ende laet

 

Wilt ons ionst toch aensien

 

Hoe dattet ghaet, Ick sal v niet ontvlien

 

Soeckt gheen eyghen baet, Als ypocrijt quaet

 

Zo blijuen zy verwaet,

 

Die nijders die ons bespien

 

Doet na Venus raet, dat is al ons gebien

 

Ghy bloeyen Egelentieren. etc.