Een Aemstelredams amoureus lietboeck

Een Amoreus Liedeken.

Gratigues eerbaer iong van zinnen,
Amorues gesellekens de minnen,
Wilt ghy beginnen,
Venus vlas te spinnen,
Hout v stil van sinnen,
Leeft altijt duechdich, Leeft. etc.
Zingt en springt scinct drinct de mos
Met vroukens iuechdich // vliet verdriet siet niet wat cost,
Verquist v goetgen vruechdich.

Weest beleefdich voor de maecht ter eren
Of ghy sijt knechten en anders zijt ghi heren
Bedeckt de maechden haer ere // Hoort wat ick v lere //
Wilt haer lof vermeren,
Geeft haer die crone Gheeft haer die crone,
Zingt en springt schinct drinct de mos
Met vroukens schone,
Vliet verdriet siet niet wat cost //
Venus salt v lonen.

Peynst toch wat een vrouken mach bedencken,
Wilt haer trouwelijc v gratieuesheyt schencken,
Als haer ooghskens quincken,
Hete traengiens sincken // Die liefden dan doet blincken,
Als past bitijden, Als past bityden,
singt en springt schinct drinct de mos //
Met vroukens blijde //
Vliet verdriet siet niet wat cost,
sorgen stelt besijden.

Als kadetten zijt iuechdich in v fluere,
Maect bancketten scenct de wijn schoon van cluere,
Hoort ghy dan truere // V ouders zijn daer vuere //

[p. 60]

 

Peynst om de schoon figuere

 

Spoet v dan vaerdich, spoet v dan vaerdich

 

Zingt en springt, schinckt drinct de mos

 

Met vroukens aerdich, vliet verdriet ziet niet wat cost,

 

Peynst de bloem ist waerdich.

 

 

 

Spoet v ter iachten, vrylijck sonder vragen,

 

Dach ende nachten, wilt sorghe daer voor dragen,

 

Vint ghy v behagen, Rijst op eert t'gaet daghen,

 

peynst of nyders saghen Slaet vroukens achte,

 

Zingt en springt schinct drinckt die mos,

 

Met ghoede ghedachten,

 

Vliet verdriet siet niet wat cost,

 

Troost wilt verwachten.