Een Aemstelredams amoureus lietboeck

Een Amorues Liedeken.

Ghepeyns, gepeyns, vol van envyen
D'welck oorspronck is dat menich truert
Hoe queldy my met fantazien
My dunckt dat my mijn herte schuert
God gheue haer vruecht wien t'gebuert
Al doetse my dese quale
Haer wesen fier heeft my bekuert
Mits coluer van corale
Rast v ghy Nachtegale
Vliecht wt dat wilde wout.
Ghaet segt haer dit al te male
En groetse menichfout.

Ick peynse om venus discipline,
Die my so late sant dese sucht
Hoe spadiger liefde hoe meerder pijne
Hoe blinder wonde hoe argher ducht
Een tijtlijck fruyt neemt saen de vlucht
Ghepluckt ten groenen dale
Men prijst best een volwassen vrucht
Ghelijck dese kuyssche smale
Rast v. etc.

Beloften veel is zy my schuldich,
Maer onder een excellent
Daer na verlanghet my menichvuldich,
Wat tis tis haer bekent,
Wat ick bedrijue in haer convent
Dit altoos ick verhale,
Vonde ick my leech, al is zy absent
Van haer ick niet en fale,
Rast v ghy. etc.

Ghepey is hoe soudy niet gehinghen,
Ick moet eylaes tis groot noot,
Dat doen tien duysent vreemde dinghen,
Ons beyde ghebuert, zy wert al bloot
Wy drincken vrucht en droefheyt groot,
Beyde wt Fortuynen schale
Door tswaer ghepeyns van dit exploot,

[p. 59]

 

t'Herte sterft al waert van stale //

 

Rast v etc.

 

 

 

Mochtmen met cruyde oft medecyne

 

Ghenesen mijnder liefden brant

 

Ick waer ghenesen vander pijne

 

Maer neent ten helpt sulck onderstant

 

Dus ghaet t'eylaes aen mijnen kant,

 

Door t'last der minnen strale

 

Ick vloeck den Afgod die my bant

 

Met Venus bitter dwale.

 

Rast v etc.

 

 

 

Priencesse ick swijghe veel om beter,

 

Als ick peynse om v oude spel

 

Ick vant ter werelt noyt secreter

 

Dies vrese ick twint dese nyders fel

 

Vrouw Venus deckt haer kinderkens wel

 

Draghen zy huessche tale

 

T'sal al wel zijn door mijn beuel

 

Schoon lief dat is principale. Rast v etc.