Ala poewema foe Trefossa

[p. 65]

III
Tra poewemaaant.

[p. 66]

1. grasbarkiaant.

 

wan njoen poewema

 

e fré go, e fré kon

 

lek wan grasbarki

 

n'a lanki

 

f' pe mi de - pe m' no de.

 

 

 

ef' a faja

 

foe joe inisé-ai

 

kan kot gwe

 

na mindr' a konfrijari

 

foe den libisma

 

te n'a bonjo

 

foe grontapoe,

 

prakseri mi dan

 

mi mati.

 

 

 

foe mi kan poeroe

 

poewema-temekoe foe tide

 

na mi tapoe

 

nanga na sabi

 

tak siri de na froktoe,

 

ma mi toe domroe

 

toti-toti lek wan sekondoe

 

na ini tripa

 

foe wan star.

[p. 67]

2. man nanga moenaant.

 

now man nanga moen tan abra,

 

man di sabi moen.

 

a foegoe-foegoe foe den workoe

 

e switi mi anoe,

 

lek a foegoe-foegoe foe wan djakti

 

n'a lont-lontoe foe wan skin,

 

wan neti

 

d'a ben moro kowroe

 

lek now.

 

 

 

now moen nanga sabi tan abra,

 

wan sabi te jana.

 

man wai nang' a soen-soen

 

foe bamboesi.

 

 

 

now kibri-tor e béf-béfi

 

lek korki-fré,

 

dape

 

p'a moro soifri sani f' mi srefi

 

e lang' anoe foe miti

 

a moro soifri sani

 

na dorosé.

 

 

 

now moen nanga doengroe nomo de

 

lek wan fra-fra poewema,

 

d'e wakti

 

foe kisi skin.

[p. 68]

 

now lost' e opo,

 

lostoe te jana,

 

foe ari kon èn bosi

 

ala boen.

[p. 69]

3. Granakiaant.

 

liba de lon

 

na mi ati lanpresi,

 

doengroe de kon,

 

ma dineti

 

lampoe sa leti.

 

 

 

na mi broki

 

lanteri sa brenki

 

foe sori

 

pe pori,

 

mek foetoe d'e kon

 

feni dré gron.

 

 

 

joe sa kon tideneti,

 

Granaki?

 

 

 

bika ef joe no kon,

 

dan agen mi moe waka

 

tapoe ston, tompoe-tompoe,

 

waka èn soekoe

 

kibri timba,

 

foe wan dé mi kan doro

 

joe drompoe.

[p. 70]

4. Amimbaaant.

 

libi njoen gi joe

 

lek a fos firi

 

tak wan tra sé de,

 

tak wan trawan de.

 

te ai foe joe toeka

 

san domroe

 

in dé.

 

a no memre,

 

ma na marki.

 

 

 

Amimba, Amimba,

 

te dé dongo tide m'e go mit joe na pasa

 

pe m' sa fen a sorfroe watra,

 

p'a soifrifasi foe libisma

 

no sek-sek no wàntron ete.

 

foe was mi ai-wiwiri,

 

foe mi krin mi kra?

 

 

 

te joeroe sa kot opo wan dé

 

lek watramoen di lepi,

 

mi sa de na in'bere foe den

 

lek memre di njoen

 

gi joe,

 

Amimba?

 

 

 

te dé dongo tide m'e go mit joe,

 

Amimba.

[p. 71]

edewiwiri lontoe joe fesi
so prisiri,
lek te dréten e kon.

ala den pkin-pkin wortoe
d'e pré bonsbak
e sjebi so brenki,
te den djompo kon baka.

ai na wan esrede,
wan tide,
wan tamara,
wan oten?

ai na wan kontren
foe katoen,
di lontoe mi siri so safri,
so sroiti...

so opo,
lek a boen
f' wan armakti loen
na baka sebintara.

[p. 72]

6. a fosi libaaant.

 

foe tanapoe

 

n'a moro gran sjoro;

 

foe djompo

 

èn swen n' ini kowroe

 

moesoemamantenwatra,

 

na dat sa kiri

 

boesi d'e bron

 

na baka ai-boeba?

 

 

 

tiri foe tégo

 

e ronboto sribipe

 

wan toe joeroe.

 

 

 

ma tamaramamanten,

 

biten-biten,

 

genti foe den strati

 

sa dongo kon.

 

 

 

hondro-hondro jari

 

sa sripsi na mi pari.

 

 

 

ma wan toe paspasi dropoe,

 

den sa foktoe joe, mi tongo,

 

wan toe djamanti dropoe

 

foe na fosi dopoe?

[p. 73]

7. Opo! Kondreman...aant.

 

Opo! Kondreman oen opo!

 

Sranangron e kari oen.

 

Wans ope tata komopo,

 

Wi moe seti kondre boen.

 

Stré de f'stré wi no sa frede,

 

Gado de wi fesiman.

 

Heri libi te na dede,

 

Wi sa feti gi Sranan.

di blankofsiri loek en oso lontoe,
wan légifasi foeroe sabaten,
di now den lostoe foe en skin b'e kren,
ben kren kon doengr' en ai, di den kis pontoe.

a broko go na in pranasi prontoe,
a koemander a wenke f' kon nang' en.
na oema saka ede f' di a sjen;
hen masra djompo f' di a fir n' afrontoe.

ma tok bakra kis let a kroetoe-doro.
pansboko lala, prit a baja skin.
osan katibo-nengre abi f' taki?

foe m'ma a si na kré, foe p'pa den soro;
na dat mek Joli-Coeur, wins a ben pkin,
pramisi: ‘Wakti boi, te m'e go naki!’

[p. 74]

9. refensiaant.

 

foe tek refensi, dàt Baron ben wani.

 

‘Kir den jobo’, na so en sten ben bari

 

na Kotka sé, ‘no mek nowàn jo-hari,

 

oen rampener den kadami abani.’

 

 

 

den man ben soetoe frambo gi ala sani.

 

pranas b'e broko nanga bigi b'bari.

 

faja anga feti no ben de f' bedari.

 

oedoe b'e prèp, smoko b'e tap den prani.

 

 

 

ma di den bita-ati man f' Baron

 

graboe wan blankofsiri libi-libi,

 

san den ben jere no ben de foe bribi.

 

 

 

Baron ben tak: ‘F'a sjat ten d'i ben kon

 

na kondre dja, joe no b'e sor prisiri

 

f' di wi b'e sari... go, joe boeba diri.’

[p. 75]

10. Afibaaant.

 

sa' e gro skin so?

 

kotsingi-kré

 

na mindr' a gongosa

 

f' den parwa

 

te springiwatra

 

e hesi-hasti!

 

 

 

pranas tak n' Afiba!

 

 

 

a tap drib'oedoe

 

d'e poer broedoe

 

Afiba fosfos jorka e kré

 

sens katibo-dé.

 

 

 

griooo! bereman!

 

griooo! bereman e dede.

 

moenkenki-brenki wan tek mi pkin,

 

wan tek mi malata-pkin.

 

 

 

katibo ben afrontoe Afiba.

 

masanengre ben bari

 

ma: tjoeboen!

 

Afiba, Afiba, san hat joe so?

 

 

 

Sa' e gro skin so?

 

drib'oedoe e broko genti!

 

sramaka-mama e kré f'a gwenti.

[p. 76]

11. troes edeaant.

 

troes ede

 

te j'e psa

 

na in mi masanga.

 

namkoe te doengroe

 

e dangra tron doistri

 

lek neti.

 

 

 

troes ede

 

nanga joe bréti

 

na ondro den panta foe mi loktoe.

 

wàn-wàn foe den bre-brenki fo joe

 

moksi nang' a gowtoe-asogri foe mi gron

 

sa fas densrefi lek faja-faja

 

na mi noko.

 

 

 

troe, mi n'a trobi

 

tak troeli tek faja

 

ef a bradi en prasoro foenpéri

 

nomo

 

na tapoe f' a tanpe f' mi pipel.

[p. 77]

gi Loulou

bonjo èn broedoe nomo? moro de!
a gers mi tap a baka isri trarki
èn soso arki nomo mi kan arki;
foe go, mi no man waka go wànpe.

ma moro wortoe de na tra lanpe!
ke fa m'e angri f' broko ala barki
foe go na dorosé èn si den marki,
tak foeroe tégo-san' e wakt' ete.

boen set ensrefi f' bari swit koemara
na den d'e bribi na wan son-tamara,
d'e wakt a baka fara wan njoen froedoe.

na dorosé wawan mi moes foe feni?
grantangi f' di mi boeba opo greni
foe m' si sa' e brenki in mi égi broedoe.

[p. 78]

13. srefidensiaant.

 

joe sab na makti

 

foe den omen-omen jar-hondro

 

na joe baka,

 

d'e kwinsi joe siri

 

go na den somen-somen jar-hondro

 

na joe fesi?

 

 

 

pipel,

 

ef joe lek na oni foe lé

 

t'a kon lai joe chromosomo srefi,

 

osort wini sa de

 

n'a jari-kaba?

 

 

 

na baka den moen

 

d'e sroiti na jari

 

trawan de opo

 

foe gi jesi

 

na wan njoen kari.

 

 

 

pipel,

 

kaseri joe srefi

 

bifo wan njoen santa sweri

 

sa boro na joe mofo boeba

 

kon na doro.

[p. 79]

 

pipel,

 

kaseri joe srefi

 

bifo wan njoen tan-makandra

 

sa span grontapoe

 

- te foe priti -

 

nanga wan redi tamara.

[p. 80]

14. nanga wàn aiaant.

 

nanga wàn ai d'e loekoe

 

lek d'e doe den wroko boemoe,

 

nanga a trawan d'e nogosi

 

wan kron-kron nogosi,

 

foe lai den botri.

 

 

 

in libimakandra

 

d'e pré kibridóeman,

 

den ipokrit!

 

ma ten sa kon

 

te kibri-sí-man-kandra

 

sa leti.

 

 

 

dan libi makandra sa koekoe

 

den goinosiso kadami trowe

 

nelek morsoe skoema.

 

 

 

dat sa hat den foefoerman,

 

di b'e kwins den goro-goro tapoe

 

foe den prefoerman

 

di ben bari:

 

djoe!

[p. 81]

15. hoemor in èksèlsisaant.

 

didibri fir a fart tak bigi grani

 

bjo psa grontapoe her-es, mofo-jari.

 

a manpkin f' Gado, so Tata ben wani,

 

bjo tron wan libisma. - oh gran frijari!

 

 

 

‘M'e por a pré, m'e blèkout alasani.’

 

na so didibri opo mofo bari,

 

‘M'e kot den drat a tap a heri plani,

 

d'e tjar elektrik-powa gi den stari.’

 

 

 

ma ... wroets! sjatsroiti panja branti-faja.

 

didibri kori hen krabjasi, baja!

 

a bron hen langa barba-kakoembe.

 

 

 

èn engel singi: hoemor in èksèlsis!

 

den lafoe kwa-kwa: libi de pro vobis!

 

èn bébi-Jesus kré a fosi: jè-è-è.

[p. 82]

16. Josef ori-tjar Mariaaant.

 

Jozef ori-tjar Maria,

 

waka go èn waka kon.

 

den ben soekoe dape, dja,

 

presi foe den go didon.

 

 

 

den no feni asisteri.

 

takroe neti tapoe den.

 

wins den aksi f' ala speri,

 

loen no de na Bethlehem

 

 

 

nowan kompe ben kan jepi

 

den toe weri wakaman.

 

sma no sab tak joeroe lepi

 

gi Maria, bereman.

 

 

 

na ini doengroe, nanga frede,

 

Josef ben moe tek kaw-pen

 

- foe na kowroe neti hede -

 

f' kibri winti èn alen.

 

 

 

sribikrosi den no tjari;

 

den ben kanti skin na gron.

 

jere! njoe-njoe pkin ben bari.

 

jere! switi Jesus kon.

[p. 83]

 

nomo hila engel singi.

 

loktoe, leti de njanpré.

 

skapoeman na firi wiri.

 

glori kmoto te na hé.

 

 

 

èn a gersi boensi-boensi

 

her' grontapoe, sondro bro,

 

- ala sani, not no toemsi -

 

e bar-bréti, e faro.

 

 

 

na foe di Maria kria

 

Jesus, Gado manpikin,

 

na f' wi alamala fia

 

njoen jarhondro ben bigin.

[p. 84]

17. bébi-boiaant.

 

di Gado ten kis-foeroe,

 

n'a joisti, joisti joeroe,

 

Maria b'e dodoi

 

wan nofi bébi-boi.

 

 

 

boerkaw pir-ai tanfoeroe,

 

ohin-boeriki loeroe.

 

Maria b'e dodoi

 

wan nofi bébi-boi.

 

 

 

gi ala kriatoeroe

 

gi ala den koeltoeroe

 

Maria ben dodoi

 

a nofi bébi-boi.

[p. 85]

18. skapoemanaant.

 

na f' di mofinawan froestan

 

san nowan speri dangra soekoe

 

of' lési na ini bigi boekoe

 

kan poeroe fré gi ibriwan,

 

 

 

na f' dat mek skapoeman ben kon

 

anbegi joe na kaw-masanga.

 

toe doesoen jar' a psa, solanga,

 

ma te tide a tor' e lon.

 

 

 

èn nen foe den no kon na krin.

 

a no wan sabiman afersi.

 

san fika f' den, na so a gersi,

 

w'e gi pikin lek ertintin.

[p. 86]

dri kownoe sjoebi kon na tap kameri;
wan gran-sabana pasi den ben fon.
(na neti star b'e tja den lek lanteri;
na dé d'e bron na ini faja son.)

bikasi kibri koni mek den leri
tak basman tra afersi de foe kon.
(Maria pkin ben tja kon njoen mansperi,
ma den no sab ete fa lib e lon.)

awins Herodes angri f' kir a tori,
a lasi krin-krin f' di proféti sori
tak sani de foe psa na Bethlehem.

masanga tap bre-brenki star tan tiri:
nanga lespeki koniman-maniri
dri kownoe arki pin-pin Jesus sten.

[p. 87]

foe joe mi n'a-
bi djaso
ferfprenki no-
so skrifi,
mama foe mi,
no wan san de,
no marki sref
de f' si f'i.

no téke tan,
portrèt kwetkwet,
gerspopki no-
ti f' dati,
ef nos a m' de
empresi w'wan
d'i lib na in
mi ati.

ke meki mi
kadamifas
a prenki dis
no pori,
ma tak a de
na in mi kra
lespekifas
mi m' sori.

[p. 88]

d'e trowstoe ala f' wi, flaw, breki, a'e geme!
d'e stotoe ala f' wi, ke loekoe fa a'e dribi.
wan dede doengroefa na fes ai f'en kon sibi,
di doe-oen lek rows, te dow nanga waran no de.

grontapoe, ke, di goedoe f'en kon foer i te,
oen stari, èngel, di na hemelkondr' e libi,
oen sma f' di tanpe dja, oen mombi dedesribi,
now Jezus loekoe f' go, oen kownoe e dongo gwe?

foe di a'e dede, mi toe den kan tja-go beri,
ma moro foer a'e gwe en dede wan mi f' meri,
o moro foeroe na mi jeje lib' e lon.

ke wondroe hé! osortoe soema de so srapoe,
di kan ferstan tak krakti f' swakafas a'e kon,
tak lib' e dede gwe, mek dede opo tnapoe?

[p. 89]

a no den Djoe, mi Jesus, no den krois i,
no den ben srepi go na kroetoe joe,
no den ben spiti na joe fesi toe,
no den pansboko mek joe skin gi poisi.

a no sroedati mek a big aboisi
nang wipi, mokro ... so wan kroektoedoe!
no den ben lekt a oedoe let-opoe,
no den ben djambel f' mek joe djakti froisi.

na mi, ke Masra, mi ben doe joe so.
na mi n'a hebi di b'e kot joe blo.
tité na mi di den ben tai joe lontoe.

mi spikri, lansri joe, gi joe fonfon.
a srapoe maka-kron, foe mi a kon.
na mi pikadoe gi joe di afrontoe.

[p. 90]

oh man f' pina di weri maka-kron,
na neti breki broedoe fesi f' joe
e bron lek bigi wewet flan, o-doe
foe tégo sari mek so krin joe kon?

saf-brenki lobi, drégi joe kon tron.
fa mofo pi-i-i, joe n'e tak wàn takroe.
j'e waki na joe krois, j'e tir-laf toe,
Gado f' gran-sikrit, goedoe f' wi Patron.

oh faja-bro f' pina in kowroe f' loen!
krin-doe foe pen na doengroe f' di kontren!
wondroe foe lobi, nemre foe ferstan!

ai ba! m'e jere nomo a toen-toen
so sari f' broedoe dropoe; te m'manten
m'e fir en ai f' granlobi pen d'e tan...

[p. 91]

24. boen frédaaant.

 

masra, agen a prenki f' Gorgatha!

 

m'e si j'e fraw gwe ondro stéf son-hati,

 

a braka broedoe in joe anoe nati.

 

d'e njanpré dede f' joe na hogri fa!

 

 

 

d'e seki ede, kofoe; bari: ha!

 

pikin foe Gado... oedoe f' sjen... loes dati!

 

d'e meki b'boe gi joe, kaw tifi hati.

 

èn spotoe f' den babawman joe moe tja.

 

 

 

mi Gado aladé agen m'e si

 

joe ai e waki switi-safri mi.

 

a gers j'e swi-swi: jóe toe bigin drégi?

 

 

 

ja, Masra, m' de na mindri den lawman.

 

ma mi n'e skempi; Gado pe m' sa tan?

 

ke, gi dasnoti, fos joe ai kon légi.

[p. 92]

25. m'e kré foe bromkiaant.

 

m'e kré foe bromki masi na ini knopo,

 

moesdé f' den prodo srefi den no si.

 

m'e kré foe lobi di no loesoe opo

 

èn f' di nowàn kon sabi ati f' mi.

 

 

 

joe kon, mi firi - ma m' no taki bi;

 

fra-fra mi si j'e drai gwe sondr' opopo.

 

na baka sjatoe kori m' doekroen pi

 

na tégo sombra pe mi sari kmopo.

 

 

 

so lek wan fowroe di sidon na hé

 

go wiki pranpran: mindrineti krin,

 

a dènk a dé, a fringi froiti kon.

 

 

 

ma te f' te doro moemoe f'ai fadon,

 

a doengroe baka: soso wan toe lin

 

f' wan safri kragi meri bon tapsé...