Poëmata
(1623)–Jacob van Zevecote–Ad Illustriss. Principem Scipionem Cobellutium S.R.E. Presb. Card. & Biblioth.
MAgne Cobelluti cuius virtutibus impar
Submittit fasces nostra Camoena suos:
Quem patriae patrem sublimis Roma fatetur,
Patronum studijs quem dat Apollo meis.
Si fortasse tuus quâ viuat in vrbe Iacobus,
Quídve tui quaeras Musa clientis agat:
Vrbs iacet innumeris passim famosa trophaeis,
Bruxellam patrio nomine Belga vocat;
Hîc lepidis dulces studijs impendimus annos,
Et sequimur Clarias Numina nostra Deas.
Hîc qui vicino blanditur murmure Zenna
Me docet in certos cogere verba pedes.
Augustosq́ue viros tenui describere versu,
Ingenio dignos nobiliore cani.
Coupigny Dominum quem stirps doctrinaq́ue summum
Inter honoratos iussit habere locum.
Corselij titulos, & magni nomina Peckî,
| |
[pagina 232]
| |
Kinschotiq́ue sacram Wowerijq́ue fidem.
Et te quem proprio nutriuit lacte Minerua
Blitterswyck generis gloria rara tui.
Nec te Bronchorsti, nec te diuine Miraee
Indictos patitur versibus esse meis.
Innumerosq́ue alios lethi quos lege solutos
Fama triumphatâ viuere morte sinet.
Hi mea Phoebaeis incendunt pectora flammis,
Hi tribuunt faciles in mea vota Deas.
Et Gandae immemorem patriae praeponere suadent
Arma Brabantorum si modo fas sit humo.
|
|