Tvoyage van Mher Joos van Ghistele

(VIII, 26) [Over Tunis en zijn koning]

[D]us te Tounis inde havene ende poort ghecommen zijnde, zo ghinghen de voorseyde alle tsamen tsanderdaeghs an land ende inde stede, de welcke als nu de principaelste es van alden lande, zo Carthago ende Affrica plaghen te wesene, ende worden gheleedt eenen langhen wech recht door de stede, altoos ghenouch oostwaert gaende, toot dat zij quamen an eene poorte vander steden, ende die leden quamen ter stont an eene groote, viercandtte, bemuerde plaetse, maer eenen inganc (401v) hebbende, ghenouch ghelijckende den chaennen vooren ghescreven, ende es tlogijst ende fondigo van alden kerstenen cooplieden, Franckij ghenaemt, daer inde stede zijnde, als Venetsianen, Jenevoisen, Cattelaennen ende meer andere nacien, elc hebbende haerlieder plaetsen ende stacien up hem zelven al binnen den voorseyden fondigo ende beloken, van welken woonsteden de Veneetsianen ende Jenevoisen de scoonste ende zuverlicste hebben. Inder Venetsianen plaetse es eene zuverlicke keercke, ghesticht inde eere van Onser Liever Vrauwen, ende inder Jenevoisen plaetse es ooc eene schoone keercke, ghesticht inde eere van Sente Lauwerenis, daer in men daghelicx messe doet.²¹¹ Insghelijcx hebben de andere nacien ooc cappellen up hem zelven, ende logierden alle te samen int conclave vanden Venetsianen, mids dadt alle galleyen van Venegien waeren, daer zij zeere wel ende vriendelic ontfanghen worden.

211 Ontleend aan Adorno, cap. 25.