Tvoyage van Mher Joos van Ghistele

[p. 376]

(VIII, 11)

(369v) [N]u omme voort te scrivene vander successien des voorseits Torcx, zo salmen weten dat hij hadde principalic twee zoonen. Doudste was ghenaemt sulthem Yldrem Bpayazit, de welke was ghestelt van zijnen vader ter bewaernessen vander provincien van Damasia, verscheeden van Constantinopolen onttrent vijftien dachvaerden, ende de tweeste ende joncste was gheheeten Gremy sulthem of Zinzime sulthem,⁸⁸ ghestelt ende gheordonneert van zijnen vadere ten gouvernemente vander provincien van Caramanella, verscheeden van Constantinopolen onttrent twintich dachvaerden. Dus de Torck overleden zijnde, de nieumaren vlieghende, zo dede de oudste zone zulcke diligencie bij gambellen courant ende andere dieren, dat hij was den tienden dach naer de doot van zijnen vadere in Constantinopolen ghehuldt ende ontfanghen als heere. De tweeste zone die insghelijcx ooc niet en ruste, meenende zijnen oudsten broeder gheanticipeert te hebbene om zekere querelen hem daer toe purrende, dede ooc groote diligencie, maer quam te spade want zijn broeder was inde possessie, ende dus reisende, nam de zelve joncste broeder met fortsen inne (370r) eene stede, Bursia ghenaemt, daer hij vant eenen capitain, gheheeten Ayagvech,⁸⁹ met twee dusent gyenyssers den welcken hij ter neder warp, slouchse doot ende vincse. De oudste zone, zijn broeder, als keyser ghehuldt zijnde in Constantinopolen, vernemende ende hoorende de comste van zijnen joncsten broedere ende de victorie in zijn beghin, ter stont zonder delayeren trac uut Constantinopolen met vijftich of tsestich dusent mannen, passerende 't Canael van Constantinopolen, ende quam legghen siege voor Bursia daer zijn broeder in was, ende ontboot hem dese naervolghende woorden: ‘Eist dat ghij de zone zijt des keysers, comt in bataillen mij bevechten, ende diedt windt bezittet tsiege imperiael’. Twelcke hoorende sulthem Gremy, bij advijse van eenen zijnen capitain, ghenaemt Yagabbegiz Yssen Ogbiz,⁹⁰ quam ter stont te velde uuter steden van Bursia met onttrent vijftien dusent peerden ende wat voetknechten bevechten zeere mannelic ende vromelic zijnen broeder sulthem Yldrem Bpayazit, maer zo de fortune altoos den eenen ghehuldegher es et cetera, zo viel de victorie up Yldrem ende Gremy viel inde disconfiture, alle zijn volc doot ofte ghevanghen, ende hij ontvloot ende wart ghevolcht toot buuten den limiten van Caramanella daer hij gouverneur ghezijn hadde, ende onttrent twee dusent vromer Tarters ende Persanen worden ghevanghen ghebrocht voor Yldrem Bpaiazit, de welke deedse alle inden (370v) midden ontween smijten naer de justicie ende maniere vanden lande. Ende metter victorien keerde weder in Constantinopolen, daer hij zeere onderdaneghelic ontfanghen was, disponerende ter zelver tijt wel twee milioenen van ducaten den ghonen die met hem ghezijn hadden, ende insghelijcx onder andere heeren ende capitainen, daer mede hij teenegader ghecreech den goeden wille ende minne vanden volcke. Ghevende zijnen oudsten zone, ghenaemt sulthem Abdula, tgouvernement van Caramanella daer Gremij uut verjaecht was, zijnen tweesten zone gaf hij tgouvernement van Amasia daer hij zelve plach te gouverneerne, ende zijnen derden zone stelde hij in Bursia dat zijn broeder inghenomen hadde.

88 D.i. Djem (‘Zizim’ in westerse bronnen, maar deze benaming ontbreekt in de nieuwstijding), de jongere zoon van Mohammed II. Hij deed twee mislukte pogingen om de macht te veroveren en stierf in 1495 te Napels. Met ‘Caramanella’ wordt het gebied rond Karaman bedoeld (Tu. Karaman Eli).

89 Ietwat corrupt voor Ayas Beg. De nieuwstijding heeft ‘ayac beg’.

90 Corrupt voor Yakub Beg Ashtinoglu. De nieuwstijding heeft ‘yagup begg isstin ogly’.

[p. 377]

De inhuldiging van Bayazîd II in 1481 ‘...hij was den tienden dach naer de doot van zijnen vadere in Constantinopolen ghehuldt ende ontfanghen als heere.’ (p. 376)