Tvoyage van Mher Joos van Ghistele

(VII, 21)

[A]l dit voor bij ghepasseert ende voort rijdende eenen verren wech, zo comt men weder an wat hooghden, maer en es gheen zwaer ghebeerchte, ende dat leden zijnde, zo comt men ter rechter hand an eene schoone beke daermen lancx henen rijdt, metter welker eene schoone water muelne draeyde. Niet verre van daer ter luchter hand es een steenrootskin hoghe ende steil, up dwelke voortijts een schoon cast[e]el plocht te stane dat al te nieuten es, maer daer staet als noch een proper doorpkin, gheheeten Thahom. Dat leden zijnde ende voort rijdende altijts beerch ende dal, zo comt men ter stont daer de voorseyde berghen hende nemen, latende een schoon casteel ter rechter (346r) hand up eenen hooghen beerch, ghenaemt Satifa,¹³⁰ ende een doorp daer onder ooc zo ghenaemt. Item van danen voort zo wordtmen rijdende duer eene schoone planure inde welke men seit dat voortijts vele grooter strijden gheschiet zijn tusschen den kerstenen, Persanen, Tarteren ende Tuercken, vul van lopenden beken die hendelinghe inde zee vallen. Dus duer de zelve ghereden hebbende eenen verren wech, zo comt men up eene riviere vander groodtten dat de Dendere te Denremonde zijn mach, over de welke men rijdt met eender scoonder steenender brugghen, ende daer over zijde, comt men ter stont in een schoon doorpkin daermen van allen te coope vindt diesmen behouft van zuvel weghe, maer lettel anders yet, daer ooc een goet chaen staet. Van daer voort rijdende, latende al tvorseyde, zo comt men noch an eene andere riviere, ooc van ghelijcker groodtten, daermen inghelijcken met eender brugghen over rijdt, daer ooc een schoon chaen an staet ende een schoon doorpkin, ghenaemt Lemaresalsa. Ende over de voornoemde brugghe wezende, zo comtmen ter stont wedere in eene wonderlicke langhe planure, maer ten sommeghen plecken niet breedere dan drie mijlen, te anderen twee milen, zeere vruchtbarich, duer cruust ende duer raeyt met velen beken ende wateren, zo datmen alle vijf oft zes boochschoten over

130 Sâfîta.

[p. 351]

een beke moet, de welke commen uuten beerghen die daer ter luchter zijden an ghestrect ligghen, ghenaemt de beerghen van Tripolij oft van Surien, ende (346v) breedt haer de zelve ghenouch tooter zee toe. Dus noch voort rijdende, zo comt men an eene plecke, ligghende ter luchter hand onder tghebeerchte, daer een groot ghestichte ghestaen heeft, nu al te nieuten, anders dan daer noch een schoon doorp staet, ghenaemt Archa, an twelke staet eene steenrootse als een ront berghelkin, ghenaemt Mons Lupardorum, omtrent twee milen van Tripolij, daer up dat staet eene sepultuere over de noortzijde, die zes ende twintich voeten lanc es, vander welker eeneghe zegghen dat daer voortijts begraven es gheweest Josue die de kinderen van Ysrael int land van beloften brachte, alzomen daer af leest ten boucke van Josue, maer dat en es niet waer also vooren verclaert es.¹³¹ De kerstenen van dien lande zegghen datter begraven leyt Canaam, zone van Cam die Noes zone was,¹³² de welke daer omtrent woonde zomen daer houdt. Daer gheleden zijnde ende duer vele beken ghereden hebbende, zo comt men an een chaen dat zeer groot ende steerc es, met dicken hooghen mueren ende met carteelen ronts omme, sluutende met eender steercker poorten jeghens de corsaren, dat daer zee roovers gheheeten zijn, die van Rodes ende van anderen kerstenen landen daer dicwilt plaghen te commen, roovende ende vanghende al dat zij ghecrighen consten. Lijdende tvoorseyde chaen ende wat voort reisende, zo comt men an eene scraghe van ghebeerchte, steenachtich, commende uuten hooghen ghebeerchten ter luchter hand gheleghen dweers duer de planure (347r) toot up de zee, daer recht up tpointkin een steerc casteel plach te stane, al te nieuten als nu toot eenen steercken torre, daermen eeuwelic wake up houdt jeghens de zee roovers, rontomme met eenen cleenen keytiveghen doorpkin. Dat achter latende ende voort rijdende, zo werdt de planure zo cleene dat zoe nauwe een halve mile breet en blijft, ende zo comtmen ter stont an eene plaetse daer de zee een cleen colfkin werpt inde steenrootse, daert zelden was zonder zee rovers van Rodes, van Langho¹³³ ende andere heylanden daer onttrent gheleghen, om twelc te beletten de souldanen daer hebben doen maken eenen steercken torre daermen ooc altoos wake up houdt. Tvoorseyde colfkin voor bij lijdende, nakende Tripolij, zo comt men teender plecken daer noch eenen ghelijcken torre staet, daermen ooc nacht ende dach wake up houdt, ende zo voort rijdende, latende vele schoone doorpen ligghen ter luchter hand onder tghebeerchte, comt men daer eene schoone moskea es. Daer bij staet ooc eenen schoonen viercantten put, ghenouch oft eenen viver ware, inden welken twee schoone fonteynen vallen daer mede een groot wiel draeyt dat eenpaerlic dwater up weerpt in buusen ende goten daer toe ghemaect, met welken watere ghearouseert werden vele schoone lochtinghen daer omtrent gheleghen, dat alte schoone ende ghenouchelicke eene plaetse es tansiene. Daer leden, zo comtmen up de riviere duer Tripolij loopende, daer Sente Eustacius verloes zijn wijf ende twee kinderen zo voren (347v) daer af gheseit es,¹³⁴ duer welke men altemet rijdt alst dwater cleene es. Die leden, men comt ter stont up de groote plaetse daer de heydenen haer sepultuere houden, ende zo quamen zij inde stede van Tripolij daer zij zeere blidelic ontfanghen waren, hemlieden ghenouch doot gheestimeert hebbende.

131 Zie Tvoyage II, 38.

132 Vgl. Van Breydenbach, 52v: ‘Sed creditur potius istud esse sepulchrum chanaam filii cam filii noe (...)’.

133 Kos.

134 Tvoyage VII, 2.