Tvoyage van Mher Joos van Ghistele

(VI, 20)

[A]lzo voort rijdende, zo comt men teender plecken, ghenaemt Macharap,¹¹⁰ ligghende ande rijsinghe van eenen ghebeerchte daer ooc een chaen an staet, zeer te nieuten ghebrocht vanden Arabianen. Ende van danen scheedende, rijdtmen meest al beerch ende dal duer eene steenachteghe maertse toot eender stede, ghenaemt Mara,¹¹¹ ter luchter handt (310r) des weeghs ligghende, wel also groot als Brugghe, maer en heeft poorten, mueren noch vesten, daer alte quade heydenen woonen ende vele gaffaren, dat ooc alte quaet een gheselscip es, vertasserende de kerstenen als zijse bekennen, twelcke zo ghebuerde als de voorseyde aldaer leden, want elc moeste gheven eenen ducaet. Maer de voorseyde casendaer in wiens gheselscip zij waren, vernemende datmen vanden voorseyden gaffarie begheert hadde, dede den zelven gaffaer vanghen, eene groote kethene anden hals doen, hem ontcleedende tooten gortrieme toe, ende also leeden rontomme den voorseyden

110 Ma'arret-en-Numan.

111 El Ma'arra.

[p. 315]

gheselscepe, hem duer slaende met swacken gheerden al zijn vleesch ontween, omme dat hij de stautichede ghedaen hadde gaffarie te nemene van die in zijn gheselscip waren, zonder zijn consent, ghemeerct dat de voornoemde stede was onder de jurisdictie vanden heere van Damasco, zinen heere, maer haerlieder ghelt en hadden zij niet weder, ende verstonden dadt de casendaer zelve themwaerts behilt. Item van danen noch voort rijdende, altoos beerch ende dal eenen verren wech, zo comt men an een groot ghebeerchte daer een stede ghestaen heeft, wel bemuert maer zonder vesten, ghenaemt Jouway,¹¹² ooc vander grootten dat Brugghe zijn mach in Vlaendren, de welke al te nieuten es zo datmer gheen bescheet af en siet. Dese voor bij lijdende ende voort reysende ghenouch ghelijcken wech, zo comtmen teender plecken, ghenaemt Semar, daer een schoon chaen staet, gheheeten naer de voorseyde plecke, steerc boven maten. Zeer corts (310v) daer naer, wat voort ghereden hebbende, comt men in eene schoone lusteghe valleye, zeere groot, principalic inde lijngde, want zij gaet tooter valleyen van Sermin vooren ghenomt, vul van allen besaeitheden, van couthoene ende van allen vruchten diemen peinsen mach, ende up de updrachten ronts omme vul van doorpen ende olijfboomen zo dadt al bosch schijnt van verren, ooc vervult met vele schoonder cudden van beesten. De voorseyde leden, quamen ter stont teender plecken, ghenaemt Serekelp, daer een schoon doorp staet ende ooc een chaen van ghelijcken name. Dat voor bij gheleden, rijdende ghelijcken wech, zo comt men weder an een ander doorp, ghenaemt Barcon, ligghende an een ghebeerchte ghenouch ghelijc den Casselbeerch,¹¹³ dat hem strect upwaert wech metten eenen hende naer tdesert van Arabien, an twelcke plocht te stane de oude stad van Alapen, die nu al ghedestrueert ende te nieuten es omme der Arabianen wille. Noch een lettel voort rijdende eenen cleenen wech, zo comt men toot eender updracht van wat ghebeerchs an een schoon doorp ende chaen, ghenaemt Tumiaen, daer een proper rivierkin duer loopt twelc comt van bij Alapen, ende daer zo draeyt eene costelicke watermuelene, vele goeds weert zijnde den heere van diere plecken. Te desen zelven doorpe ende chane pleghen de cooplieden ende passanten deen den anderen te verbeidene, die reysen willen van Alapen naer Damasco ofte daer omtrent, om duploopinghen te scuwene der Arabianen. Van desen (311r) doorpe voort rijdende, altijts ghenouch beerch ende dal eenen grooten wech, zo comt men daer eene schoone moskea al nieuwe ghemaect es, ende van daer sietmen eerst bescheedelic de vermaerde stede van Alapen daer zij groote begheerte naer hadden.

112 Niet te identificeren, evenmin als de plaatsen Semar, Serekelp, Barcon, Tumiaen in de hierna volgende passage.

113 De Kasselberg in Frans-Vlaanderen.