Tvoyage van Mher Joos van Ghistele

(VI, 5)

[G]heleden zijnde de zelve, zo comt men ter stont in zeere groot ghebeerchte, int generale ghenaemt tghebeerchte van Surien, ende es alte quaden, aerbeidelicken

[p. 290]

wech, crom ende slom omme draeyende, glat als een hijs, ende hoemen hogher upwaert clemt, zo hij quader ende argher es, (283r) vul van haghen doornen ende struucken, ghenouch omme ansien oft een bosch ware. Ende langhe zo ghereden hebbende, comt men an eene schoone overvloeyende fonteyne, loopende inde voorseyde riviere. Item noch altijts voort rijdende ende clemmende, ghenouch gheliken wech, latende diverssche doorpkins hier ende daer int ghebeerchte, zo quamen zij an wat dalinghen daer een chaen staet, ghelijc den anderen vooren verhaelt. Dat leden ende voort reisende, zo beghintmen weder van nieus te clemmen, hogher ende hogher, crom ende slom ommedraeyende, toot datmen tooter heelft comt, daer zij vonden eene schoone neringhe tusschen wat ghebeerchts ter luchter hand, inde welke woonen eene maniere van volke, ghenaemt Drousij, nauwelic ghelijckende van usancien kerstenen, heydenen, ydolatren³⁴ noch jooden, maer es eene nacie up hem zelven, hetende veerkin vleesch ende wijn drijnckende in alder manieren ghelijc den kerstenen; daer omtrent wast ooc zeere goeden steercken wijn. Ende beminnen meer den kerstenen dan den heydenen ofte joden, zegghende dat zij maechscip vanden kerstenen zijn. Dese valleye gheleden zijnde, zo beghintmen wederomme van nieus ten beerghe waert up te clemmene, ende men comt ter stont an eene nauwe passaige daer twee huusen als huttekins staen ant hanghen vanden beerghe, inde welke woonden ooc gaffaren³⁵ als tollenaers, zo vooren van ghelijcken gheseit es. Dat leden zo reistmen noch wat voort, altoes hogher ende steilder clemmende, toot up dupperste van eenen berghelkin, daer eene zeere overvloeyeghe fonteyne staet. Ende ter luchter hand af sietmen eene schoone wonderlicke (283v) diepe vruchtbareghe valleye, daer in vele scoonder doorpen staen, vul woonende vanden zelven Drousij. Item leden zijnde tvoorseyde passaige ende beerghelkin, ende voort reysende altoes clemmende, zo comtmen toot eenen anderen beerghe, vele hoogher dan daer vooren af ghescreven es, zo quaet, steil ende dangereus om rijden, dat onmoghelic ware van zegghen, daer ghenaemt Lemayenfa, dats te zegghene ten doech niet vele, ende heeft inder waerheit wel zijnen name, want den meesten tijt vanden jare zo en can mer niet duer gheraken mids der snee diere meest altoes leit, zoe dat daer dicwilt de lieden met hueren beesten, kemelen, mulen ende paerden versmooren ende bedeerven. Ooc zo en machmen daer somwijlen niet duere mids den winden, reghenen ende vulen wedere, bijden welken de passanten bij fortssen dicwilt moeten stille ligghen neghen of tien daghen; ghebuert ooc wel datmer in comt met schoonen vriendelicken wedere, maer eermer uute gheraect, verandert zo datmer groote vreese lijdt. Als de voorseyde uut dit wonderlic ghebeerchte waren, zo bleven zij noch altijts hoogher ende hoogher clemmende eenen verden wech, maer niet zo aerbeytelic als den vooren ghescreven, toot dat zij quamen up tupperste, twelke zo hooghe es, datmen schijnt inde wolken zijnde. Ende van danen voort zo beghintmen te dalen, eenen zo aerbeytelicken ende steilen wech, datmen vanden (284r) beesten beeten moet ende te voet gaen, toot men comt ghenouch tooter heelft des weechs vanden beerghe; daer vindtmen een schoon groot doorp, ghenaemt Bouwersse,³⁶ ant hanghen vanden beerghe in wat plaens lands. In twelke woonen alte vriendelicke heydenen, alle meest mockers, dat zijn vrachtenaers der kerstenen, die de coopmanscip over en weder voeren vander eender plaetsen ter andere daer mense heb-

34 Zie aant. III, 29.

35 Zie aant. I, 21.

36 Brummâna?

[p. 291]

ben wilt, ende ghenouch in midden vanden voorseyden doorpe staet eene schoone overvloeyeghe fonteyne, zeer goet water uut werpende, daer mede tselve doorp ghewatert es winter ende zomer even ghewillich. Item scheedende van daer, zo worden zij noch altoos voort ende voort dalende eenen verren wech, ooc niet zo aerbeytelic noch zo steil als den wech vooren ghenoumt, zo langhe toot zij quamen teenegader in eene schoone valleye ten hende vanden voorseyden ghebeerchte.